جرنیل سنگھ
Jarnail Singh

Punjabi Kavita
  

Pattian Naal Dhake Jism Jarnail Singh




پتیاں نال ڈھکے جسم جرنیل سنگھ

ٹرانٹو توں اڈیا منیشا دا جہاز لاس اینجلس پہنچ چکا سی۔ اتھے اوہ اک فیشن شوچ حصہ لین آئی سی۔ ایہہ کوئی عام جیہا فیشن شو نہیں سی۔ امریکہ، کینیڈا تے یورپ دے وڈے وڈے وستر وپاریاں ولوں سپانسر کیتے ایس شو وچ فیشن انڈسٹری دیاں اگھیاں ہستیاں، ہالی ووڈ دے کجھ سٹار تے نامور میڈیاکار خاص طور تے شامل ہو رہے سن۔ ایس وچ ٹاپ ماڈل دا اعلان وی ہونا سی۔ لاس اینجلس ایئرپورٹ توں باہر آؤندیاں منیشا نوں انج لگا جیویں فلماں، ٹی.وی شوآں تے فیشن دے گڑھ ایس پرسدھ شہر نے اس نوں اچیچ نال 'جی آیاں' آکھیا ہووے۔ 'فیشن دی دنیا وچ نویاں شیلیاں پرچلت کرن والے ایس شہر وچ ایلانے ٹاپ ماڈل دی دھم دور دور تک جائے گی۔' اوہ ریجھ ہلارے وچ بڑبڑائی سی۔ جدوں ٹیکسی 'فیشن ڈسٹرکٹ' وچیں لنگھی تاں دو سو توں ودھ، تھوک تے پرچون کپڑے دے سٹوراں نوں رشنا رہیاں سورج دیاں پہلیاں کرناں اس نوں شبھ دن دا اشارہ دیندیاں جاپیاں۔ 'بیسٹ ویسٹرن ہوٹل' 'چ پہنچ، اوہ نہا کے تیار ہون لگ پئی۔ اٹھ وجے اس نے، دوستاں ورگے اپنے فیشن ڈیزائنر وین فلپ نوں ملنا سی۔ اس کولوں شو بارے ہدایتاں صلاحاں لینیاں سن۔ وین اوس نوں ساڑھی 'چ دیکھ کے زیادہ خوش ہوندا سی۔ زین دا خیال چھڈ اوس نے ساڑھی کڈھ لئی۔ تیار ہو کے اوس نے آدمکد شیشے وچیں خود نوں نہاریا سی...گوری لشکویں گردن اتے متھے اتے جھومدے کٹے ہوئے کالے شاہ وال، سنہری شیڈوء تے کالے مسکارے نال سجیاں پلکاں ہیٹھ نشئی مرگ نین، عنابی لپسٹک نوں مان بخشدے، گلاب پتیاں وانگ ٹہکدے، مسکراہٹاں کیردے ہونٹھ، گورے گلابی چہرے تے سنہری لشک ماردا تکھے نک دا کوکا، کالے بلاؤز وچیں روپمان ہوندا انوکھا شباب اتے لچکویں قمر تے بنہی ہوئی سنہری بارڈر والی کالی ساڑھی۔ اپنے ہوٹل کمرے دا دروازہ کھولدیاں وین پھلپ نے مسکرا کے منیشا نوں باہاں 'چ لیا، چمیا تے حال چال پچھیا۔... منیشا نے کوفی میکر 'چ ابل رہی کوفی وچوں دو کپ بنائے، اک وین نوں پھڑا دتا تے دوجا آپ لے لیا۔ کوفی سپ کردا وین شو دی دوڑ بھج بارے دسن لگا۔ اس توں شو دی روپ ریکھا سندیاں منیشا نوں جھٹکا وجا۔ وین دس رہیا سی، ''ایہہ فیشن شو وکھری قسم دا ہووےگا، فیشن+منورنجن۔ پج رہیاں اہم شخصیتاں نوں خوش کرن لئی ماڈلاں پول ڈانس کرن گیاں۔'' “پر مینوں تاں پول ڈینس آؤندا نہیں۔'' منیشا پریشان ہو گئی۔ “کوئی گل نہیں، توں ہور آئٹماں راہیں کسر کڈھ لئیں۔'' “اوہ کیہڑیاں؟'' “وستراں دی تھاں مستی پہن کے۔'' وین اکھاں وچیں ہسیا۔ “کیہ مطلب، نگن ہو کے؟'' منیشا جھنجلا اٹھی۔ “نگن نہیں، انگاں تے اک اک پتہ لٹکا کے۔'' “وین توں کیہ کہہ رہیں؟'' تلخ ہوئی منیشا بولی، “پتیاں والی گل پورنوگراپھی اے۔ فیشن کپڑیاں تے میک اپ دا ہوندے۔ جے ماڈلاں دے جسماں تے کپڑے ہی نہیں ہون گے تاں فیشن شو کویں بنے گا؟'' “پر شو پروڈیوسرز ایہہ چیزاں منگدے نیں۔'' “کیہ ساریاں ماڈلاں ایہہ کرن گیاں؟'' “میں پرسوں دا ایتھے آں۔ سارے پاسیاں توں بڑکاں لے رہیاں۔ ایویں تھوڑیاں کو نوں چھڈ کے باقی سبھ کرن گیاں۔'' “مشیل کرے گی؟'' مشیل لافنٹین وی منیشا وانگ ٹاپ ماڈل واسطے امیدوار سی۔ “پول ڈینس تاں نہیں پر پتیاں والی ضرور کرےگی۔'' “تے سنڈی؟'' “اوہ دوویں کرے گی۔'' “اوہ تاں کرے گی ہی، سپر ماڈل جو بننا ہویا۔'' منیشا نے ہؤکا بھریا۔ “تے توں بیٹھی رہ تھاں دی تھاں۔ دیکھ منیشا! جاں تاں سپنے دیکھنے بند کر تے جاں ڈٹ کے مقابلہ کر تے دوجیاں توں اگے لنگھ۔'' وین نے جھڑکی دتی۔ “ہوں... جے میں اپنیاں باقی آئٹماں نال پتیاں والی وی کردیاں تاں کیہ میری ٹاپ ماڈل دی گل بن جائے گی؟'' کسیلی جاپدی کوفی دا گھٹ لنگھا کے منیشا نے پچھیا “امید تاں بڑی اے۔ میں تیری گل چلائی ہوئی اے۔'' “امید نہیں، پکی گل کر۔'' “منیشا! جے میرے وس 'چ ہووے، میں تاں اک پل وی نہ لاواں... ایس شو دے سپانسرز تے پروڈیوسرز بھاویں وڈیاں توپاں نے، اپنی مرضی کرن والے پر میں اپنے ولوں کوئی کسر نہیں چھڈاں گا۔'' وین دا سیل فون کھڑک گیا... گل کرن بعد اس نے منیشا دا ہتھ اپنے ہتھاں 'چ لیا تے بولیا، “منیشا ڈارلنگ! توں میری 'نمبر اک' ماڈل ایں۔ تیرے کول خوبصورت جسم دے نال ماڈلنگ کلالنگ وی کمال دی ہے۔ مشیل نوں مات پاؤنا تیرے لئی کوئی مشکل نہیں۔ میں وی پورا زور لا رہیاں۔ توں تکڑی ہو، پورے زور شور نال پرفارمینس دینی آں... شو توں پہلاں ریہرسل کرنی ایں۔ توں چار کو وجے ہال چ پہنچ جائیں۔'' وین ولوں ملے اتشاہ نال منیشا دا موڈ کجھ ٹھیک ہو گیا۔ اکھاں 'چ اکھاں پا کے بولی، “لنچ اکٹھے کراں گے؟'' “کوشش کراں گا، پر پکا نہیں کہہ سکدا۔ دوڑ بھج بہت اے۔ ہن وی ایہہ شو دے کوآرڈنیٹر دا فون سی، اودھر جا رہیاں۔'' آکھ اوہ منیشا دے کول نوں ہو گیا۔ بلھاں نال بلھ جڑ گئے...۔ “میں چھیتی جانے۔'' کہندیاں وین نے بریپھکیس اٹھا لیا۔ منیشا وی باہر آ گئی۔ اپنے ہوٹل کمرے 'چ پرت کے منیشا نے کیجوئل کپڑے پہنے تے آرام کرن دی سوچ کے بیڈ تے لیٹ گئی۔ پر من ستھر نہیں سی ہو رہیا۔ متھا گھٹدیاں اس اندروں آواز اٹھی، 'کنا رولا سی، اکھے وڈے پدھر دا بہت اعلیٰ شو ہون جا رہیا اے... سواہ تے کھیہہ، نری نگنتا تے کامکتا۔ کلا تے سہج والی تاں کوئی گل ہی نہیں دسدی۔' ایہہ نگنتا کامکتا منیشا لئی کوئی نویں چیز نہیں سی۔ پہلاں وی کسے کسے فیشن شو 'چ اجہیاں آئیٹماں دی منگ آ جاندی سی۔ کافی ماڈلاں خرمستی 'چ اوہ آئٹماں کر دیندیاں۔ باقی دیاں کوئی ہور آئٹماں چن لیندیاں۔ منیشا اوہناں وچوں سی۔ کجھ شوآں 'چ موسماں انوسار، اس نے چھوٹے کپڑے وی پہنے سن، پر اوہ پورنوگراپھی توں دور رہی سی۔ اوس دی ماڈلنگ کلالنگ تے ڈیزایننگ کلائیننگ دی قدر کردے وین پھلپ نے اس نال دوستاں ورگا رشتہ بنایا ہویا سی۔ ڈیزائننگ سبندھی منیشا نال ہوندا وچار وٹاندرا اس لئی لاہے وند سی۔ ماڈلنگ ایجنسی 'ینیک' دا مالک ایرک ڈالٹن وی منیشا نوں مہتتا دیندا سی۔ اوہ اس نوں دوجیاں ماڈلاں نالوں ودھ کمائی کرواؤندی سی۔ مہتتا دین دا اک کارن ہور وی سی۔ اتری امریکہ دیاں پرمکھ فیشن ایجنسیاں وچوں اک 'ینیک' ہی سی، جس وچ گوریاں توں علاوہ افریکی، چینی تے بھارتی مول دیاں ماڈلاں وی شامل سن۔ ایہہ ماڈلاں سن تاں بھاویں اک اک، دو دو ہی پر ایس نال ایرک دی ایجنسی، گلوبل سندریاں دا گلدستہ کہاؤن دے یوگ ہو گئی سی۔ منیشا دی اپنے ماڈلنگ سٹائیلگ نوں لے کے وین، ایرک اتے ہورناں نال ہن تک تاں نبھ گئی سی پر اج دے شو نے کسوتی ستھتی پیدا کر دتی سی۔ جے پتیاں والی آئٹم کردی سی تاں نگن ہون والی گل سی، جو اوس دی روح نوں سویکار نہیں سی۔ تے جے نہیں کردی سی تاں کیریئر دیاں سخراں چھہن، یعنی ٹاپ ماڈل بنن دے سپنے بکھردے سن۔ 'کراں تاں کیہ کراں؟' دبدھا 'چ نپیڑ ہو رہی منیشا نوں انج محسوس ہویا جیویں لشکاں ماردے کمرے 'چ دھوآں چھا گیا ہووے... اسدا دم گھٹن لگا۔ اس نے پھرج وچوں پانی دی بوتل کڈھی، پرس چکیا تے کمرے نوں جندرا مار دتا۔ ایلی ویٹر راہیں تھلے اتر کے اوہ ہوٹل موہرے بنے گارڈن 'چ بیٹھ گئی۔ آسے پاسے کجھ ہور لوک وی مئی مہینے دے سہاونے موسم دا آنند مان رہے سن۔ “ہائے منیشا۔'' ایوا نے اس نال آ ہتھ ملایا۔ ایوا 'سٹوپ رونچینیس سنستھا'دی گپت ورکر سی۔ اسدا کم لک چھپ کے، فیشن شو دیاں انیتک سوہاں خبراں لینا سی۔ منیشا دی اس نال واقفیت جینیفر راہیں ہوئی سی۔ جینیفر، ڈزائیننگ دی پڑھائی سمیں منیشا دی جما عتن رہی سی۔ اج کل اوہ 'سٹوپ رون چینیس سنستھا' دی چیئرپرسن سی۔ “ہائے ایوا۔'' منیشا نے اس نوں گارڈن بینچن تے اپنے ساہمنے بٹھا لیا تے پچھیا، “توں اسے ہوٹل 'چ ٹھہری ہوئی ایں؟'' “نہیں، میرا ٹکانا گپت ہے پر میرا زیادہ ٹائم ایس ہوٹل اتے 'ایئرٹیل پلازا ہوٹل' دے دوآلے بیت رہے کیونک ساریاں ماڈلاں ایہناں دوناں ہوٹلاں 'چ ٹھہریاں ہوئیاں نے۔'' “کس دی سپائیئنگ کر رہی ایں؟'' “کجھ بندے شک دے گھیرے 'چ ہیگے نے پر اجے میں دس نہیں سکدی۔ تیرے مطلب دی دس دیندی ہاں، تیرا ڈیزائنر وین اج کل ڈومنکا نوں چک رہے۔'' منیشا نوں جھٹکا وجا۔ اٹالیئن مول دی، بائی سالا ڈومنکا وٹو، اوہناں دی ایجنسی دی ہی ماڈل سی۔ سکھراں چھوہن لئی کالھی، اوہ تن کو سالاں 'چ ہی 'ریڈ ہوٹ بیوٹی' وجوں چرچت ہو چکی سی۔ “ایوا تینوں ایہہ سراغ ملدے کتھوں نیں؟'' اپنی گھبراہٹ لکاؤندیاں منیشا نے پچھیا۔ “ماڈلاں اتے فیشن شوآں دے پربندھکی عملے 'چ ساڈے سیل ہن۔'' ایوا نے دسیا۔ “تہاڈی سنستھا اوہناں نوں پیسے دیندی اے؟'' “کسے کسے نوں ہی، عام ممبر ولنٹیراں دے طور تے کم کردے ہن۔ اوہناں کول جاں تاں جوباں ہیگیاں نے جاں اپنے کم، جیویں جینیفر جوب کردی اے، میرا بیوٹشین دا اپنا کم ہے۔'' “اج دے شو دیاں عجیب آئیٹماں بارے پتہ لگ گیا ہونے۔'' “ہاں لگ گیائے۔ دیکھو، پول ڈینس سٹرپ ٹیزپ دی آئیٹم اے، فیشن شو دی نہیں۔ پتے منکھ دے جنگلی جیون ویلے دی پوشاک سی۔ ادوں کپڑا ہوند 'چ ہی نہیں سی آیا تے ہن اینا کپڑا لیڑاا ہون دے باو جود جنگل ول نوں مڑن دا کیہ مطلب؟ ... رونچ کلچر ساڈے سراں نوں چڑھ گئی اے۔'' ایوا بولی۔ اوسدا دھیان ہوٹل دے مکھ دروازے ول سی۔ باہر نکلدی اک اچی لمی حسینہ نوں تکدیاں اوہ بولی، “مشیل لگدی اے۔'' “ہاں اوہی اے۔'' منیشا نے پشٹی کیتی۔ مشیل نے اوہناں نوں نہیں دیکھیا سی، اپنے دھیان اوہ پارکنگ لوٹ ول نوں مڑ پئی۔ “او.کے. منیشا! پھیر ملاں گے۔'' کہندیاں ایوا اٹھ پئی۔ “بس! بہہ جا گھڑی، ودھیا گلاں چل رہیاں سن۔'' “پھرسہی۔ میری کسے نال اپوائٹمنٹ اے۔'' تے اوہ اپنی کار ول نوں ٹر گئی۔ مشیل تے ایوا دیاں کاراں اگڑ پچھڑ باہر نکل گئیاں۔ مشیل لافٹین نیویارک دی 'اے ون' ایجنسی نال ماڈلنگ کردی سی۔ فرانسیسی مول دی ایہہ سندری 'سپر سیکسی بیوٹی' دے طور تے مشہور سی۔ ایس نوں چرچہ وچ لیاؤن والا فیشن ڈیزائنر کرے گ، ناٹوری جوسی کروز دا چیلا سی۔ ناٹوری نے ویہویں صدی دے اخیرلے دہاکیاں وچ لانیرینوں فیشن شوآں 'چ لجا کے اتے لانیرے دے ادھار تے استری پشاکاں ایجاد کرکے ترتھلی مچائی سی۔ 'ناری چیتنا' دیاں سنستھاواں نے ناٹوری دی ڈیزائین شیلین دی ورودھتا کیتی سی۔ سنستھاواں مطابق عورت دا، اندرلے وستراں نوں باہری پشاکاں وانگ دکھاؤنا تے بیڈروم دے وستراں نوں لوکاں وچ لجانا، ناریتو دی توہین سی۔ پر وپار تے میڈیئے نے 'ناری چیتنا' دی پیش نہیں سی جان دتی۔ گارڈن بینچ تے بیٹھی منیشا مشیل بارے سوچ رہی سی، 'نیلی بیکلیس ڈریس 'چ پتہ نہیں کدھر گئی اے... اپنے آپ نوں راج کماری ڈیانا سمجھدی پئی اے۔' منیشا دے چیتے وچ دو کو سال پہلاں دی گھٹنا ابھر آئی... اک پارٹی 'چ مشیل، منیشا نال اپنی برابرتا دیاں گلاں کرن لگ پئی سی۔ منیشا نے ہس کے ٹال دتا سی پر جدوں اوہ نہ ہی ہٹی تاں جھیڈ جیہی کر دتی، “مشیل ڈارلنگ! میں تیرے برابر کتھے؟ تیرا لیول بہت اچے۔'' مشیل کجھ نہیں سی بولی۔ اپنی کڑتن اندر ہی اندر پی گئی سی۔ جس مشیل نال منیشا نے جھیڈ کیتی سی اج اوہی مشیل منیشا دے مقابلے تے آ کھڑی سی۔ مقابلے دیاں آئٹماں وچ پتہ پوشاک اہم آئیٹم بنا دتی گئی سی... سوچاں 'چ الجھی منیشا خود نوں پچھ رہی سی، 'نگن ہو کے کیہ رہیگی تیری؟ کتھے کھڑیگا تیرا کلا گورو؟'... پر اگلے پلاں وچ اوس دے من اندر ٹاپ ماڈل دی لوچا ابھر پئی سی۔ دپاسی سوچ دی گھمن گھیری گہری ہوئی جا رہی سی۔ اوس دیاں پڑپڑیاں 'چ چٹاکے پین لگے۔ 'وین نال بیٹھ کے کوئی ویء آؤٹ کڈھدی ہاں۔' سوچدیاں اس نے وین دا فون نمبر دبا دتا۔ کوئی اتر نہ ملیا۔ اس نے سنیہا چھڈ دتا، “وین! پلیز کال می بیک۔'' پر اس دا فون نہ آیا۔ منیشا دی بے چینی ودھن لگی۔ اس نے پرس وچوں ٹینشن دی گولی کڈھی تے بوتل دے پانی نال اندر لنگھا لئی۔ کجھ ٹکاء آؤن تے اوہ کمرے 'چ پرتن لئی اٹھ پئی، پر پیر نہ اٹھے... کمرے اندر اس دا دم گھٹن لگ پینا سی۔ اتھے بیٹھی رہن نوں وی دل نہیں سی کردا۔ پچھے کھلوتا بہومنزلی ہوٹل اتے آلا دوالا اس نوں بدرنگ جیہا جاپن لگ پیا سی۔ اوہ کسے پاسے گھمن جان لئی سوچن لگی۔ لاس اینجلس بارے اس نوں جانکاری ہیگی سی۔ شانتی بھالدے من 'چ 'روز گارڈن' ابھر آیا۔ سویر دا اس نے کجھ کھاہدا وی نہیں سی۔ ہن وی دل تاں نہیں سی کردا پر ٹینشن سمیں خالی پیٹ رہنا وی اوہ ٹھیک نہیں سی سمجھدی۔ اس نے پہلاں ٹیکسی نوں فون کیتا تے پھیر 'کیلسیز ریسٹورنٹ' نوں، سینڈوچ اتے سوپ پیک کرن واسطے۔ بھانت سبھانتے رنگاں روپاں والے گلاب دے پھلاں نال بھرے ہوئے وشال باغ وچ گھمدیاں منیشا نوں کجھ چین ملی۔ اکھاں نوں کولے کولے لگدے پھلاں دی خوشبو اس نوں تازگی دے رہی سی... چٹے تے اسمانی پھلاں دیاں کیاریاں دے اک خاموش کونے چ بیٹھ اوہ سینڈوچ کھان لگ پئی۔ سیل فون وجن تے اس نے نمبر پڑھیا اتے حیران جیہی ہو گئی... اجے سویرے ہی تاں ایتھے پہنچ کے اس نے موم نال گل کیتی سی۔ تے ہن کیہ ہو گیا سی؟ خیر اس نے ہنگارا بھریا، “ییس موم۔'' “بیٹی! تینوں چیتا ہونے، میرے گوڈے دے اوپریشن بارے آپاں ہسپتال والیاں نوں کیہا ہویا سی پئی جے میری ڈیٹ توں پہلاں کوئی کینسلیشن ہووے تاں اوہ ڈیٹ مینوں دتی جاوے۔'' “ہاں ہاں مینوں چیتے۔'' “ہسپتالوں فون آیا اے۔ ستائی مئی خالی ہوئی اے۔ اودن تیرا کوئی فیشن شو وغیرہ تاں نہیں؟'' “نہیں، ستائی مئی پکی کر دیو۔ میں تہاڈے سرھانے ہوواں گی۔'' “تھینک یو میری لاڈلی... ہور ہیتھے کیویں چل رہے؟'' “ٹھیک چل رہے موم۔'' منیشا نے اتر دتا۔ فیشن شوآں دیاں سمسیاواں اوہ موم نوں گھٹ ہی دسدی سی۔ موم چنتت ہو جاندی سی۔ آلے دوالے، ہوا 'چ جھوم رہے پھل اس نوں ہور سوہنے لگن لگ پئے۔ سکھاویں رؤں 'چ اوہ بڑبڑائی، 'چنگا ہو گیا، ڈیٹ لاگے ہو گئی۔ موم سدھی ہو کے تر سکے گی۔ لنگ ماردی زیادہ ہی بڈھی لگدی اے۔'... تے اس دے کناں وچ ڈیڈ دے کہے ایہہ شبد پتہ نہیں کدھروں آ گونجے، 'سنیتا دی جڑتی ایس طرحاں دی اے کہ اہنے بڈھی ہو کے وی بڈھی نہیں لگنا۔' ایہہ کتھن سمیں دی گردش نے صحیح نہیں سی ثابت ہون دتا۔ پر جہینیں دنیں منیشا دے ڈیڈ نے ایہہ ٹپنی کیتی سی، کوئی کہہ ہی نہیں سی سکدا کہ اوہ پنتالیاں دی ہووے گی۔ مساں تیہاں بتیاں دی لگدی سی۔ اوس دی چال ڈھال 'چ مٹیاراں والی مڑک سی تے منیشا دا ڈیڈ کیہڑا گھٹ سی... کسواں سریر، موٹیاں اکھاں، تکھا نک، گورے بھارے چہرے اتے سنگھنیاں مچھاں... اک فوجی افسر لگدا سی پردیپ کمار ملہوترا۔ اس نے کنیڈا دی امیگریشن پوائنٹ سسٹم تے لئی سی۔ منیشا ادوں گیاراں سال دی سی۔ کجھ سماں ایدھر اودھر ٹکراں مارن بعد اوہ اک فیکٹری 'چ سپروائیزر بن گیا سی۔ سنیتا نوں بینک ٹیلر دی جوب مل گئی سی۔ منیشا پڑھائی چ ٹھیک سی۔ ڈرائنگ تے آرٹ اس دے من بھاؤندے مضمون سن۔ گڈیاں دیاں پشاکاں بناؤن دا شوق اس نوں بچپن توں ہی سی۔ ... تے جدوں منیشا نوں ریارسن یونیورسٹی 'چ فیشن ڈیزائینر دے ڈگری کورس 'چ داخلہ ملیا تاں خوشی 'چ کھڑی سنیتا نے آکھیا سی، “اٹ از اے گڈ کورس، بڑیاں جوباں نے ایس فیلڈ چ۔'' “کورس تاں ایس توں وی چنگے ہیگے نیں، لاء وغیرہ۔ خیر تیرا انٹریسٹ ڈزائیننگ 'چ اے، کر لے۔ پر گریڈنگ ودھیا بننی چاہیدی اے۔ باقی بیٹا! توں جم جانا نہیں چھڈنا۔ شام نوں ایویں ایدھر اودھر گھمن دی بجائے جم جانا بہتر اے، تن وی تندرست تے من وی۔'' پریرنامئی ایہہ بول پردیپ کمار نے مٹھی سر وچ آکھے سن۔ پر جدوں منیشا نے کدی کدی ماڈلنگ کرن دی اچھا پرگٹائی تاں پردیپ دے بولاں وچ کڑتن بھر گئی سی، “آپاں نوں نہیں سوبھدے ایہہ کم۔'' “جی! پہلاں پوری گل تاں سن لئو۔'' سنیتا بولی۔ “توں چپ رہ۔'' پردیپ کڑکیا۔ “بڑے خدغرض ہو جی۔'' سنیتا نے پتی ول طنزیہ مسکراہٹ سٹی۔ “کیہ مطلب؟'' “نکی موٹی ہر گل دی ٹینشن 'کلے ہی سانبھ لیندے جے۔ تھوڑی ساڈے واسطے وی چھڈ دیا کرو۔'' سنیتا دی مسکراہٹ ہاسے 'چ وٹ گئی۔ “ایڈی وڈی گل اے تے تینوں مذاق سجھدے پئے نیں۔'' “وڈی ہے نہیں، تسیں بنائی جانے آں،'' سنیتا دی آواز کھرھویں ہو گئی سی۔ “ایہہ اوہ ماڈلنگ نہیں جیہڑی آپاں انگریزی ٹی.وی پروگراماں 'چ دیکھنے آں۔ ایہہ تاں ایتھے جیہڑے کپڑے دے انڈین سٹور اے، اوہناں نے لوکل ٹی.وی.پروگراماں واسطے ایڈاں بنوانیاں جے۔ ماڈلاں دی ڈریس عام جیہی ہوندی اے۔'' “کی گلاں کردی پئی ایں توں! سٹوراں والیاں اپنی مشہوری کرنی اے، لوکاں دا دھیان کھچنا اے تے لوکاں دا دھیان عام ڈریساں نال نہیں کھچیا جا سکدا۔ سمجھی؟'' “ڈیڈ! تسیں مینوں ٹرسٹ کیوں نہیں کردے؟'' منیشا دے روہ سری بولاں نے کرودھ 'چ تنے پردیپ کمار نوں موم وانگ پگھلا کے اس اندر پرشن کھڑا کر دتا، 'کیہ میں دھی نال انصاف کر رہیاں؟ اج تک اوس دی کوئی وی شکایت نہیں آئی۔' اینے نوں سنیتا بول پئی، “انج کرنے آں، جس دن ایڈ بننی ہوئی، میں نال جاواں گی۔ آپاں نوں کڑی دا شوق پورا کرنا چاہیدا۔ نالے چار پیسے آن گے۔'' “چل ٹھیک اے۔'' پردیپ نوں تسلی ہو گئی سی۔ “تھینک یو ڈیڈ! یو آر گریٹ۔'' خوش ہوئی منیشا ڈیڈ دے گل چمبڑ گئی سی۔ منیشا اپنی سندرتا، انداز تے منموہک مسکراہٹ صدقہ بھارتی مول دیاں باقی ماڈلاں نالوں موہرے نکل گئی سی۔ اس نے جیولری سٹوراں دیاں ایڈاں وی حاصل کر لئیاں سن۔ ہور ایڈاں دی تلاش وچ جدوں اوہ ٹرانٹو دی ستھانک ماڈلنگ ایجنسی 'ڈائمنڈز' 'چ گئی تاں اوس دے 5 فٹ 8 انچ قد اتے اجلے دمکدے حسن توں پربھاوت ہوئی ایجنسی دی پریزیڈنٹ کرسٹنا فوسٹر نے آکھیا کہ جے منیشا ٹریننگ لے لوے تاں اوہ اس نوں فیشن ماڈلنگ دے موقعے وی دے سکدی سی۔ پر منیشا نے کیہا کہ اوہ صرف ایڈ ماڈلنگ ہی کرنا چاہندی سی تے اوہ وی بدن ڈھک کے۔ منیشا دی ایڈ ماڈلنگ دی پارٹ ٹائم جوب، سریراں تے دماغاں نوں تھکا دین والیاں دوجیاں جوباں دے مقابلے سوکھی سی۔ تے پرسدھی وادھو دی۔ کنے ہی لوک اس نوں جانن لگ پئے سن۔ ایس جوب نے اوس دی پڑھائی دا وی کافی خرچہ چک لیا سی۔ پردیپ تے سنیتا دا بوجھ کجھ ہلکا ہو گیا سی۔ منیشا گیان ڈھونڈارو سی۔ ڈزائیننگ دیاں پاٹھ کتاباں توں علاوہ اوہ ہور کتاباں، میگزین تے ویب سائیٹاں وی پڑھدی گھوکھدیی رہندی۔ اویں ہی ڈزائیننگ نال پب پونچے دا ناطہ رکھدی ماڈلنگ کلالنگ بارے وی اوہ گیان تلاشدی رہندی... تاں ہی تے اوہ اک ہونہار ماڈل وجوں صلاحی جان لگ پئی سی۔ اک دن جدوں اوہ یونیورسٹی دے کیفٹیریا 'چ اپنے جماعتی منڈے کڑیاں سنگ بیٹھی سی تاں جینیفر ہوویل نے آکھیا سی، “منیشا! تیری سہج مئی ماڈلنگ مینوں چنگی لگدی اے۔ اکساؤ قسم دی ماڈلنگ نے تاں بیڑا ہی غرق کر دتی۔'' “توں بولڈ ماڈلنگ نوں اکساؤ کہہ کے چھٹیا رہی ایں، ایس شیلی دیاں ایڈاں راہیں بزنساں دی ہو رہی ترقی نوں نہیں دیکھ رہی۔'' ڈگ بول اٹھیا۔ “پر ایس سلسلے 'چ ماڈلاں وی بزنس دیاں وستاں بن گئیاں نے۔ میرا مطلب بولڈ شیلی تے نہیں، حداں ٹپ گئی بولڈنیس تے ہے۔ اج دیاں بہہتیاں ماڈلاں مانو نہیں صرف جسم ہن۔'' “جینیفر! ایہہ تیرا پچھانہہ کھچو رویہ اے۔ توں ایس نوں انج کیوں نہیں لیندی کہ عورت، پرمپراواں دیاں زنجیراں توڑ کے آزاد ہو گئی اے۔'' ڈگ دی دوست بیٹی نے کیہا۔ “بیٹی! ایس آزادی دے ہوکے نوں سمجھن دی لوڑ اے۔'' “توں ہی سمجھا دے۔'' گمبھیر ہوئی جینیفر نے ٹیبل تے بیٹھے سارے ساتھیاں ول تکیا تے بولی، “آزادی دا ہوکا دے رہیاں ماڈلاں، فلمی ایکٹریساں اتے روک سٹاراں سندرتا نہیں کامکتا پیش کر رہیاں نیں۔ اوہناں دی دیکھا دیکھی عام عورتاں نے کام اکساؤ فیشن اپنا لیا اے۔ پہلاں عورتاں سوہنیاں لگن لئی فیشن کردیاں سن پر ہن 'ہوٹ' لگن لئی کردیاں نے۔ ایس طرحاں سندرتا تے آزادی دا ہوکا دے کے رونچی نیس پھیلائی جا رہی اے۔ وپار تے میڈیا رونچی نیس نوں گھر گھر پہنچا رہے ہن... میں ایس رونچ کلچر بارے پی.ایچ.ڈی. کرن دا فیصلہ کر چکی ہاں۔'' “منیشا! توں وی اپنا وچار دس؟'' کم نے پچھیا۔ “بیسکلی ماڈلاں تے ڈیزائنراں نوں کلا توں بے مکھ نہیں ہونا چاہیدے۔'' منیشا نے اتر دتا۔ “ایگزیکٹلی! تیریاں کورس اسائنمنٹس، کلا کرکے ہی تاں وشیش گنیاں جاندیاں نیں۔'' جینیفر دے چہرے تے تسلی ابھر آئی۔ کورس ختم ہون تے منیشا نوں کینیڈا دی مشہور وستر کمپنی 'سپریمو انٹرنیشنل' وچ اسسٹنٹ ڈیزائینر دی جوب مل گئی سی۔ اپنی پسندیدہ جوب دے روٹین 'چ رجھی منیشا دے سمیں نوں جیویں پر لگ گئے ہون۔ پر اس دے موم ڈیڈ دا سماں رک رک کے اوہناں دیاں سوچاں وچ بنتیاں پاؤن لگ پیا سی... دھی دے ویاہ دے گیت گونج رہے سن، اوہناں دے مناں وچ۔ سنیتا نے گل توری...۔ “اینی کالھ کاہدی اے؟'' منیشا نے حیرانی پرگٹائی۔ “ہے کملی! سکھ نال ہن تیری ویاہ دی عمر اے۔'' ماں دے بولاں وچ سدھر جھلکدی سی۔ دھی نوں مان نال تکدیاں پردیپ کمار بولیا، “بیٹا! اسیں کیہڑا ہنے کرن لگے ہاں۔ رشتے داراں تے جان پچھان والیاں 'چ تاں تیرے برابر دا کوئی منڈا نظر نہیں آندا۔ میٹریمونیئل دینا پینا جے۔ پھیر اپنی پسند دے 'ہال' دی بکنگ وی سال، ڈیڈھ سال پہلاں کرنی پئے گی۔'' “کراں گے اوتھے، جتھے توں ییس کریں گی''، سنیتا دی نظر پتی ولوں گھم کے پتری تے آ ٹکی سی، “اسیں تینوں خوش دیکھنا چاہنے آں... ساڈی اکو اک تاں اولاد ایں توں۔ اپنے سارے چاء ملھار اسیں تیرے تے ای پورے کرنے جے۔'' موم دیاں اکھاں 'چ امڈ پئے ہنجوآں نے منیشا اندر اتھل پتھل جیہی مچا دتی۔ موم والیاں ریجھاں امنگاں اتے چنتاواں اس نوں ڈیڈ دے چہرے تے وی نظر آئیاں سن۔ اوہ پسیج گئی سی...۔ میٹری مونیئل کافی عرصہ چلدی رہی۔ منڈیاں دیاں ای میلاں آؤندیاں، منیشا رد کر دیندی۔ آخر ڈھکواں ور مل ہی گیا۔ چنگی ڈیل ڈول والا، سنکھا تے سوجھ وان۔ سی وی اوہناں دی کھتری جات دا۔ سیکنڈری سکول ٹیچر۔ منیشا نے سہج ڈھنگ نال، سدھیر کھنہ نوں اپنی ایڈ ماڈلنگ بارے دس دتا سی۔ اینی کو ماڈلنگ تے سدھیر نوں کوئی اعتراض نہیں سی۔ کجھ ملنیاں مگروں منیشا تے سدھیر نے ماپیاں نوں اپنا فیصلہ دس دتا سی۔ چاواں 'چ اڈدے ماپیاں نے ویاہ دھر دتا...۔ ویاہ توں چھیتی بعد سدھیر نے ماپیاں توں وکھرا گھر لے لیا۔ منیشا گھر نوں سجا کے رکھدی۔ چیزاں دی سیٹنگ اوہ کلامئی ڈھنگ نال کردی۔ گرمیاں 'چ بیکیارڈ تے پھرنٹیارڈ 'چ سہنے سہنے پھل اگاؤندی۔ گھر دے اندر گملیاں دے بوٹیاں دی دیکھ بھال تاں اسدا باراں ماسکی رٹین سی۔ سدھیر ایس پکھوں سست سی۔ گھر دوالیوں گھاہ کٹن 'چ اوہ اکثر لیٹ ہو جاندا۔ سردیاں وچ برف ہٹاؤن لئی منیشا دے کئی وار کہن تے اٹھدا۔ اس نوں پڑھن دا شوق سی، اخباراں تے سماجک وشیاں والیاں کتاباں۔ منیشا فیشن تے ڈیزائین دے میگزین پڑھدی۔ روزمرہ دی نیرستا توڑن لئی اوہ ہولیڈیئز تے جاندے۔ اوتھے زندگی دے پھن کردے اتے ترو تازہ ہو کے مڑ جوباں 'چ کھبھ جاندے۔ منیشا دی کمپنی 'چ ڈیزائنر دی پوسٹ خالی ہوئی تاں اس نے اتے دوجی سہائک ڈیزائنر جینٹ، دوناں نے اپلائی کر دتا۔ جینٹ منیشا نالوں تھوڑی سینئر سی پر سینیورٹی نوں پہل دتی جانی ضروری نہیں سی۔ نویں نویں ڈزائین سرجن 'چ منیشا دی کارگزاری جینٹ نالوں کتے گوڑھی سی، جس کرکے منیشا نومپکی آس سی کہ ترقی اس نوں ہی ملے گی۔ سوچاں سپنیاں 'چ کنیاں اچیاں اڈاریاں بھر رہی سی اوہ... آؤندے سالاں 'چ ڈیزائنر توں سینئر ڈیزائنر، ایگزیکٹو ڈیزائنر تے آخر چیف ڈیزائنر دی چوٹی دی پوسٹ اتے... رتبہ، شکتی، ڈھیر ساری تنخواہ، ہوائی دورے اتے ذہن 'چ پلھردیاں نویاں نویکلیاں ڈیزائن شیلیاں دے پریوگ کرن دے اختیار...۔ پر پوسٹ جینٹ نوں مل گئی۔ منیشا دیاں آساں تے پانی پھیر گیا۔ سدھیر نے حوصلہ دتا۔ دوناں نے صلاح کرکے 'لیبر بورڈ' 'چ کیس کر دتا۔ 'لیبر بورڈ' نے وی کمپنی دے فیصلے تے موہر لا دتی۔ منیشا چھٹپٹا کے رہ گئی۔ آخر صبر کر لیا۔ انہیں دنیں اس نے، اپنے روزانہ کماں دے نال نال اک لیڈیز جیکٹز دا ڈزائین شروع کیتا ہویا سی۔ اوہ اس وچ رُجھ گئی۔ موڈ ٹھیک رہن لگا۔ ڈزائین نوں آخری چھہاں دیندیاں اوہ اوس دی مولکتا اتے کلاتمکتا نوں وار وار نہاردی تے مان نال بھر جاندی۔ کریم رنگی اس جیکٹ اتے ہرے، سنہری، جامنی تے کالے رنگ دے میپل پتے رچے گئے سن۔ پتے اتے اوہناں نوں جوڑدی سترنگی تار دے سمچ وچوں اک وڈا میپل پتہ روپمان ہوندا سی۔ ایہہ جیکٹ، اتپادن واسطے 'ڈزائیننگ اینڈ کمرشل کمیٹی' نے پاس کرنی سی۔ کمیٹی دی پردھان چیف ڈیزائینر سی تے کنوینر جینٹ۔ کمرشل منیجر، ایگزیکٹو ڈیزائنر تے سینئر ڈیزائینر ممبر سن۔ میٹنگ وچ ڈزائین دی، کلا پکھوں تعریف کیتی گئی۔ پر جدوں وپارک پکھ بارے کمرشل منیجر توں پچھیا گیا تاں اس نے کنتو کھڑے کر دتے... ڈزائین پاس نہ ہویا۔ منیشا دے ہتھاں دے طوطے اڈ گئے۔ جس کمپنی نوں اوہ اپنی سمجھدی سی، اوہ بگانی جاپن لگی۔ پر کجھ ہمدرد وی ہیگے سن... سینئر ڈیزائنر تے کجھ ہور کامے۔ سینئر ڈیزائنر نے ہی منیشا نوں دسیا سی کہ جینٹ نے اس نال سازش کھیڈی سی، اسدا کلا گورو توڑن لئی۔ کمرشیئل منیجر نے کنتو کیتے نہیں، اس توں کروائے گئے سن۔ چیف ڈیزائنر پہلاں ہی منیشا نال کجھ ناراض سی، جینٹ دی چون دے معاملے نوں 'لیبر بورڈ' 'چ چنوتی دین کرکے۔ جینٹ نے چیف ڈیزائنر دی اس ناراضگی نوں وی ورت لیا سی۔ جینٹ دی ڈنگی ہوئی منیشا ڈاڈھی اپسیٹ سی۔ اک دن عورتاں دی ٹوپی دے اک ڈیزائین نوں لے کے اوس دی جینٹ نال بحث ہو گئی۔ جینٹ نے اپنے اچ عہدے دا رعب چھانٹ دتا۔ منیشا اندرلا روہ بھڑک پیا۔ اس نے جینٹ دی لاہ پاہ کر دتی اتے استعفیٰ لکھ کے 'سپریمو انٹرنیشنل' نوں تھوہ کر آئی۔ سدھیر نوں منیشا دا کاہلی 'چ استعفٰی دینا ٹھیک نہ لگا۔ پر اوہ چپ ہی رہیا۔ منیشا نے سہائک ڈیزائینر دی نویں جوب دی تلاش وچ دو تھائیں ریزمے بھیجے۔ اک کمپنی 'چ انٹرویو ہوئی۔ کمپنی ولوں 'ہاں' سی۔ پر جوب پکی نہیں سی، کانٹریکٹ آدھارت سی۔ ہر سال ٹھیکے دا رینیو ہونا کمپنی دی لوڑ تے نربھر سی۔ دوجی کمپنی دی جوب تاں پکی سی پر تنخواہ بڑی گھٹ سی۔ سدھیر نے سویکار کرن لئی آکھیا۔ “ڈیئر! لوکل جیہی کمپنی اے... کوئی پھیوچر نہیں دسدا پیا۔'' مرجھائے ہوئے چہرے تے رونق لیاؤن دی کوشش کردی منیشا بولی۔ “ہنی! توں دیکھ رہی ایں، سارا کجھ بہت تیزی نال بدل رہے۔ ہو سکدا اے، کل نوں ایس لوکل کمپنی نوں کوئی انٹرنیشنل کمپنی خرید لئے۔'' سدھیر نے رائے دتی۔ “سپریمو دے مقابلے، ایہہ وی تے کانٹریکٹ والی وی، دوویں کمپنیاں مینوں بہت چھوٹیاں لگیاں نے... میری روح نہیں مندی۔'' منیشا نے نک چاڑھیا۔ سدھیر جتھے پتنی دے اچے نک توں ہرکھیا ہویا سی، اتھے اس دے کھڑے رہن والے چہرے نوں تناء گرست ہویا ویکھ فکرمند وی سی۔ ہن اوہ پہلاں وانگ گلاں وی نہیں سی کردی۔ چپ گڑچ جیہی سوچاں 'چ ڈبی رہندی۔ ... تے اک دن اوہ کشمکش 'چوں باہر آ گئی سی۔ سدھیر دی بغل 'چ بیٹھدیاں مشری گھلی آواز 'چ بولی، “راجے! میں تہاڈے نال اک امپورٹنٹ گل کرنی اے۔'' “کر۔'' “میں فیشن ماڈلنگ کرنا چاہندی ہاں۔'' “وھٹ؟'' سدھیر نوں انج محسوس ہویا جیویں فیملی روملی دی ساہمنلی کندھ تے لٹکدے کلاک دیاں سوئیاں نے اپنی چال رد کرکے اک وکھری ہی چال پھڑ لئی ہووے... حیرانگی تے روہ نال بھریا اوہ بولیا، “ایہدا مطلب سپریمو توں ریزائن توں اسے کرکے کیتا۔ دوجیاں کمپنیاں 'چ ڈزائیننگ دی جوب وی توں اسے کرکے ایکسیپٹ نہیں کیتی۔ تیرا اصل نشانہ ماڈلنگ ہی سی۔'' “سدھیر راجے! استعفے دی ساری سچویشن بارے جاندے ہوئے وی تسیں ایہہ کیہ کہہ رہے ہو۔ کتی جینٹ نے جس طرحاں میرے راہ 'چ کنڈے کھلارے، جس طرحاں مینوں زیرو کرن دیاں حرکتاں کیتیاں، میں استعفٰی نہ دیندی تاں ہور کیہ کردی؟ دوجیاں کمپنیاں بارے وی میں تہانوں دسدی رہی ہاں کہ اوہ میری یوگتا دے مقابلے نیویاں ہن، چھوٹیاں ہن۔ اوہناں وچ میں کوئی معرکہ نہیں مار سکدی۔'' “پر ایہدا مطلب ایہہ تھوڑی اے کہ ڈزائیننگ دی لائن ہی چھڈ دیو۔'' سدھیر دے بولاں وچ جھنجلاہٹ سی۔ “لئو جی! تہاڈے ساہمنے ایتھے کنے لوک، بہتری واسطے کتے بدلدے ہن۔ فیشن ماڈلنگ بہت وڈا پھیلڈ اے... مینوں اپنی سمرتھا دا پتہ اے۔ تسیں دیکھ لیو۔ میں چھیتی ہی ٹاپ تے پہنچ جاواں گی۔'' منیشا اندر جوش سی۔ “پر اجوکی ماڈلنگ 'چ جسم دکھان دا رجھان مینوں پسند نہیں... ایہہ رجھان سوشل ویلیوز دا نقصان کر رہے۔'' سکول وچ سوشولوجی پڑہاؤندے سدھیر دی سر چوبھویں سی۔ “جے ایہہ گل اے تاں سرکاراں فیشن شوآں تے پابندی کیوں نہیں لاندیاں۔'' “سرکاراں دا کیہ جاندے۔ اوہناں لئی تاں ایہہ بہت وڈی بزنس اے، جوباں دی منڈی اے، جس وچوں سرکاراں کروڑاں ڈالر ٹیکس کماندیاں نے۔'' سدھیر دیاں اکھاں وچ غصے دے چنہ ابھر آئے۔ “تاں پھیر لوک، جیہڑے فیشن شوآں نوں اینے شوق نال دیکھدے نے، اوہناں نوں کہو کہ نہ دیکھیا کرن۔'' منیشا دی سر کھرھویں ہو گئی۔ “بہتے لوکاں نوں پتہ ہی نہیں کہ ٹی.وی تے کیہ دیکھنے تے کیہ نہیں دیکھنے۔'' “میری سمجھ مطابق، کروڑاں لوک فیشن شو ایہہ جانن لئی دیکھدے نے کہ سجنا سنورنا کویں جے، خوبصورتی 'چ نکھار کویں لیاناں اے، نیرستا توڑ کے زندگی 'چ نویں رنگ کویں بھرنے جے۔'' “دیکھ منیشا! میرا اعتراض سجن سنورن جاں فیشن کرن تے نہیں، نگنتا تے ہے۔'' سدھیر نے کجھ ڈھیلا پیندیاں آکھیا۔ “میں نگنتا دی وکالت نہیں کر رہی۔ میرے لئی تاں ماڈلنگ، ہورناں جوباں وانگ اک جوب اے، آرٹپھل جوب۔'' منیشا دے بولاں وچ غرور سی۔ سدھیر نوں انج لگا جیویں گلاں کر رہی، اوس دی پتنی نہیں، پتنی 'چوں فٹ پئی کوئی ہور عورت سی۔ اوہ کڑکیا، “جس جوب 'چ کوئی ایتھکس ہی ہے نہیں، اوہ جوب تینوں نہیں کرنی چاہیدی۔'' “اج دی دنیاں 'چ جے ہور سارا کجھ بدل رہیا اے تاں سداچار کیوں نہیں بدل سکدا... جس جوب توں مینوں سنتشٹی ملدی اے، جس جوب راہیں میں اپنی ہستی دی فلفل مینٹ مان سکدی ہاں، مینوں اس توں روکیا کیوں جا رہیا اے؟'' منیشا طیش 'چ آ گئی۔ “تینوں صرف اپنی ہستی ہی دیہدی اے، میری نہیں۔ پر کن کھول کے سن لے، جے تیری ہستی دی بھرپورتا، میری ہستی نوں ہینا کردی اے تاں میں برداشت نہیں کراں گا... توں جس نوں بھرپورتا کہنی ایں، میرے وچار مطابق اوہ ڈیگریڈیشن اے۔'' سدھیر تمتما اٹھیا۔ “تہاڈے وچاراں دے ادھین ہو کے، ادھی ادھوری زندگی جیونا مینوں نہیں پروان۔ میرے لئی ماڈلنگ ودھیا جوب اے۔'' منیشا لوہی لاکھی ہو گئی۔ “دین ہیل ود یو۔'' اگ بھبوکا ہوئے سدھیر دیاں اکھاں وچوں چنگیاڑے پھٹن لگے۔ ''سیم ٹو یو۔'' روہ 'چ کمبدی منیشا نے آکھیا۔ منیشا دی نگاہ شیلف تے پئی اپنی تے سدھیر دی فوٹو تے جا ٹکی سی۔ دیوانگی وچ، ہتھاں چ ہتھ اتے اکھاں 'چ اکھاں پائی، اوہ برفباری وچ کھڑے سن۔ منیشا نے جدوں وی ایہہ تصویر تکی سی، اس نوں اپنے تے سدھیر دے چہرے تے اکسرتا دا صرور نظر آیا سی۔ پر اج اس نوں انج لگ رہیا سی، جیویں برپھباری دے دھندلکے وچ، اوہ اک دوجے نوں اجنبیاں وانگ تک رہے ہون۔ ... منیشا تے سدھیر دے ماپیاں نے اوہناں دی صلح کرواؤن تے نیڑتا گنڈھن لئی پوری واہ لائی سی۔ پر اوہ دوویں آپو اپنے محاذاں توں پچھے ہٹن لئی تیار نہیں سن۔ “اک نوں چن لوے، مینوں جاں ماڈلنگ نوں۔'' سدھیر دا سٹینڈ سی۔ “میرا لکش ماڈلنگ اے۔'' منیشا دا فیصلہ پتھر تے لکیر سی۔ “جے ماڈلنگ 'چ ہی گرکنے تاں میرے متھے نہ لگیں۔'' سدھیر تے اوس دے ماپیاں دی حاضری 'چ اپنا فیصلہ داغ کے، غصے 'چ کمبدا پردیپ کمار اٹھ آیا سی۔ “اینی سختی نہ کرو... اوتھوں ٹٹ کے اوہ کتھے جائے گی؟ ساڈے گھر ہی آئیگی... آخر ساڈی دھی اے۔'' گھر پہنچ کے سنیتا نے آکھیا سی۔ “ہن اوہ ساڈی کجھ نہیں لگدی،” لال اکھاں وچیں کرودھ دے بان چھڈدیاں پردیپ کمار گرجیا سی، “ایہہ چند چڑھیا ہی تیری مہربانی نال اے۔ جے توں شروع توں ہی ایہدیاں واگاں کس کے رکھدی تاں ایتھوں تک نوبت ہی نہیں سی آؤنی۔'' پتی اتے نال ہی ماپیاں نالوں رشتہ ٹٹنا منیشا لئی دکھدائی سی پر ستھتی نے اوس دے ودروہ نوں ہور تکھا کر دتا اتے ودروہ نے چنوتی دا روپ دھار لیا۔ سانجھا گھر سیل تے لگ چکا سی۔ سامان اٹھا کے اوہ اپارٹمنٹ 'چ موو کر گئی۔ تے 'ڈائمنڈز' ایجنسی دی مالک کرسٹنا پھوسٹر دی صلاح نال فیشن ماڈلنگ دا کورس شروع کر لیا۔ ٹریننگ مکن تے اس نے، کرسٹنا دی مدد نال اپنی فوٹو کتاب تیار کیتی، کانٹریکٹ تے ہستاخر پائے تے کم شروع کر دتا۔ چھوٹے چھوٹے فیشن شو کردیاں اس نے سہج، آکرشن تے نزاکت دے گناں والی ماڈلنگ شیلی سرج لئی سی۔ اوس دیاں پیشکاریاں دے معیار توں خوش ہوئی کرسٹنا نے اک دن آکھیا سی، “منیشا! ہن توں ماڈلنگ دی وڈی منڈی 'چ جان دے قابل ہو گئی ایں۔ تینوں تے پتہ ای اے، ساڈیاں لوکل تے وڈیاں ایجنسیاں آپس 'چ جال وانگ جڑیاں ہوئیاں نیں۔ نیویارک دی پرسدھ ایجنسی 'ینیک' نال میری گل ہو چکی اے۔ اوہ تینوں انٹرویو لئی سدن گے۔'' “تھینک یو کرسٹنا۔'' گدگد ہوئی منیشا نے کرسٹنا نوں جپھی پا لئی سی۔ انٹرویو 'چ 'ینیک' دے مالک ایرک ڈالٹن نال، ایجنسی دا فیشن ڈیزائنر والٹر وی موجود سی۔ منیشا دی ہن تک دی ماڈلنگ دیاں چونویاں تصویراں اتے ماڈلنگ تے ڈزائیننگ بارے اس دے گیان توں پربھاوت ہو کے اوہناں نے منیشا نوں اپنی ایجنسی 'چ لے لیا۔ تے نال ہی ٹرانٹو 'چ ہون والے وڈے فیشن شو لئی سدا دے دتا۔ کنا اہم سی منیشا لئی پہلے وڈے شو دا اوہ دن... تیار ہو کے جدوں اوہ بہکونی شیشیاں ساہمنے کھلوئی تاں کجھ پل اپنے آپ نوں پچھان ہی نہ سکی۔ میک اپ کلاکاراں نے اس وچوں جیویں اک نویں منیشا سرج دتی ہووے... اوس دے کالے شاہ والاں دے عارضی کنڈلاں، دلکش ہوٹھاں دی گلابی لپسٹک دی بے باک چھیڈ اتے شیڈوء تے مسکارے نال سجائیاں مرگ نیگ پلکاں دی لشک وچوں جھرناہٹ فٹ رہی سی۔ کناں 'چ جھولدے جھالردار کانٹیاں دے نگاں اتے نک دے لونگ دے لشکارے، اوس دے گورے گلابی رنگ نوں ہور اجول کر رہے سن۔ اوس دے بدن تے پوری لمبائی دا گلابی رنگا ایون گاؤن سی اتے گورے نکھرے پیراں وچ اچی اڈی والے بدھریدار گلابی سینڈل۔ جدوں اوہ رینپ تے چڑھی تاں دونیں پاسیں بیٹھے فیشن ماہراں، شو نوں سپانسر کرن والے وپاریاں، میڈیاکاراں تے چونویں درشکاں دی بھیڑ ساہویں اوس دے قدماں دی مٹک اکھڑ جیہی گئی۔ گاؤن اوس دے جسم نوں چھپا گھٹ، دکھا ودھ رہیا سی۔ اصل 'چ اپنا گاؤن اوس نے آپ ڈیزائین کیتا سی پر اوس دے ڈیزائنر والٹر نے جیوں دا تیوں پروان نہیں سی کیتا۔ گلما ہور نیواں تے سجی لت والے پاسے دا پنی تک دا کٹ اپر پٹ تیکر کر دتا سی تے ہن ادھوں ودھ ننگا ہو رہیا جسم اس اندر شرم اپجا رہیا سی۔... لوکاں دا پرشنسکی پرتیکرم بھانپدیاں اوس دی مٹک ٹھیک ہو گئی۔ چہرہ مسکرا اٹھیا۔ پر مسکراہٹ اس نے شوخ نہ ہون دتی۔ لجیا دے انداز وچ چہرے اپر پوشاک ورگا رنگ چاڑھ لیا۔ اس دے ایس انداز نے سبھ نوں قایل کر دتا۔ رینپ دوالیوں اٹھی ٹپنی 'این اینجل آن دا ارتھ' کنیں پیندیاں اسدا روم روم خوشی نال بھر گیا۔ ٹی.وی چینلاں تے فیشن میگزیناں والیاں منیشا نوں 'خوش آمدید' آکھدیاں اس وچلیاں سنبھاوناواں اجاگر کیتیاں سن۔ ٹرانٹو دی اک نامور اخبار دے کالم نویس نے شوبابت لکھے لیکھ وچ اس نوں سچ مچ ہی اسمانوں اتری پری' قرار دتا سی۔ ... شروع دے وڈے شوآں 'چ منیشا جدوں رینپ تے چڑھدی تاں کجھ گھبرا جاندی۔ ہور ماڈلاں وانگ اس نے میروانا دے سوٹھے لاؤنے شروع کر دتے۔ سوٹھے اس نوں ہلاس نال بھر دیندے، پر ڈرگی ہو چکیاں ماڈلاں بارے سوچدیاں اوہ اپسیٹ ہو جاندی۔ والٹر دی ڈزائین شیلی وی اس نوں پریشان کردی رہندی۔ 'کاؤنسل آف فیشن ڈیزائینرز آف نارتھ امیرکا' ولوں سنمانت تے 'پیری ایلس سپورٹس ویئر' کمپنی دا میت پردھان والٹر زیادہ سماں کھیڈ پشاکاں دا ڈیزائنر رہیا سی۔ اوس دی ڈزائیننگ وچ نزاکت گھٹ سی، طاقت اتے جوش ودھ۔ اوس دے رنگاں دی چون تاں ودھیا سی پر پشاکاں دیاں لائیناں دے ڈونگھے، ترچھے کٹ سہج والے ہون دی تھاں پردرشن والے سن۔ منیشا دے، اپنی پوشاک 'چ ماڑی موٹی تبدیلی کراؤن دے سجھاء نوں کدی اوہ من لیندا تے کدی رد کر دیندا۔ خیر منیشا اپنی پیشکاری وچ، چہرے خاص کرکے اکھاں تے ہوٹھاں دے ہاو بھاو راہیں، ناریتو دا رنگ وی بھر دیندی تے اس دی ایہہ وشیشتا نویکلی پچھان والی ماڈل وجوں ابھار رہی سی۔ ٹورانٹو، وینکوور، مانٹریئل، شکاگو تے نیویارک ورگے شہراں دے فیشن شو کردیاں اوس دی چنگی چرچہ ہون لگ پئی سی تے چرچہ دے نشے نے اس نوں میروآنا توں چھٹکارا دتا سی۔ پہلا اپارٹمنٹ چھڈ کے اس نے اک ودھیا بلڈنگ جسڈنگ وچ سومنگ پول ورگیاں سویدھاواں سن 'چ اپارٹمنٹ کرائے تے لے لیا۔ اوہ نیم نال جم جاندی تے تیردی۔ اسے دوران اس نے، دل دا مریض بن چکے ڈیڈ نوں ملن دی کوشش کیتی سی پر اوس دی نانہہ پتھر تے لکیر سی۔ ماں دھی مل لیندیاں سن، منیشا دے اپارٹمنٹ 'چ۔ سدھیر دے دوجے ویاہ دی خبر سن کے منیشا دے دل نوں جھٹکا لگا سی پر نال ہی گمان وی ابھر آیا سی... سدھیر نالوں ٹٹ کے اوہ ہاری نہیں سی۔ اپنے لکش انوسار کامیاب ماڈل بن چکی سی... اس دی دیہی تے نظر رکھن والے فیشن شو پروڈیوسراں، فیشن میگزیناں دے ایڈیٹراں تے ہورناں نوں اس نے 'ٹھری' مسکراہٹ ہی دتی سی۔ اوہ کلا دے زور تے ہی اگے ودھنا چاہندی سی۔ پر اِک پڑاء تے پہنچ کے اس نے محسوس کیتا سی کہ اوس دے نال والیاں اس توں موہرے نکل گئیاں سن۔ اس دیاں تصویراں مساں پنجاہ کو میگزیناں 'چ ہی چھپیاں سن جدوں کہ اوس دے مقابلے والیاں دیاں سو سو میگزیناں 'چ چھپ چکیاں سن۔ اپنی مایوسی جد اس نے والٹر کول ظاہر کیتی تاں اوس نے آکھیا سی، “توں انگ دکھاؤن توں پرہیز کردی ایں پر کمپٹیشن چ دوجیاں نالوں موہرے نکلنا چاہندی ایں۔ ایہہ کویں ہو سکدے؟'' منیشا شش وپنج 'چ پے گئی سی۔ دوجیاں ماڈلاں نوں مات پاؤن دے نگنتا ورگے طریقے، اوس دی سوچ نوں کدی ٹھیک جاپن لگ پیندے تے کدی غلط۔ کدی ٹاپ ماڈلاپ تے سپر ماڈل بنن دی کاہل بھارو ہو جاندی تے کدی کلا دی سہجتا...۔ اوہناں ہی دناں وچ منیشا ہراں دی ایجنسی دا والٹر نال کانٹریکٹ مک گیا۔ نواں کانٹریکٹ وین پھلپ نال ہو گیا۔ 'دی فیشن گروپ انٹرنیشنل' دا ممبر اتے 'کوٹی امیرکن فیشن کرٹکس' ایوارڈ تے 'ہال آف فیم' ورگے پرسکاراں نال سنمانت وین فلپ، اتری امریکہ دے چوٹی دے فیشن ڈیزائینراں وچوں سی۔ 'کولمبیا یونیورسٹی' 'چ لائیاں اس دیاں کاکٹیل ڈریساں دیاں نمائشاں نے وپاریاں تے فیشن شاستریاں دا اچیچا دھیان کھچیا سی۔ اوس دی ڈزائین شیلین جلوء تے کوملتا اتے تھراہٹ تے سہج دا سمیل سی۔ اتشاہی نہار والیاں اوس دیاں پشاکاں، ماڈلاں نوں اکساؤ نہیں روپونتی بناؤندیاں سن۔ وین دی کلا نوں پرنائی ڈیزائین شیلین منیشا دی روح نوں ٹمبدی سی...۔ فون دی گھنٹی نے منیشا نوں سوچاں وچوں باہر کھچ لیا۔ ابھڑواہے اس نے اپنا سیل فون چکیا۔ پر گھنٹی اس دے فون دی نہیں سی۔ دراصل، روز گارڈن وچ، اس دے کولوں لنگھے کسے بندے دے فون دی گھنٹی سن کے اس دے من اندرلی فون دی اڈیک ٹنک پئی سی۔ اس نے گھڑی ویکھی۔ ڈیڈھ وج چکا سی تے وین نے اجے تک اوس دی کال نہیں سی موڑی۔ جھٹ دینی اوس نے وین دا فون نمبر دبیا۔ پر کوئی جواب نہ ملیا۔ بے تابی وچ سر جھٹکدیاں اوس نے پھیر سنیہا چھڈ دتا. “وین! توں میرے فوناں دا جواب کیوں نہیں دے رہیا؟ کتھے ہیں توں؟ مینوں چھیتی فون کر۔'' اس نے ٹیکسی بلائی تے ہوٹل نوں چل پئی۔ ٹیکسی نوں ہوٹل وچ نوں مڑن لئی انتزارکرنی پئی۔ سڑک تے پولیس دی گڈی دے پچھے پچھے کاراں دی ڈار جا رہی سی، کسے دا سسکار کرن۔ کاراں تے لگیاں تختیاں اتے لکھیا 'پھیونرل' شبد اس اندر ڈونگھا اتر گیا۔ اوس دے قدم کمرے ول ودھ رہے سن پر من کئی ورھے پچھانہ چلا گیا سی... ماتمی دن اوس دیاں اکھاں ساہویں آ کھلویا... اوس دے ڈیڈ دی ہارٹ اٹیک نال موت ہو گئی سی... موم دے گل لگ، اوہ بھباں مار مار روئی سی۔ 'فیونرل ہوم' وچ پئی ڈیڈ دی دیہہ نوں ڈلھدیاں اکھاں نال تکدیاں اس نوں انج لگا سی جیویں اوہ کہہ رہیا ہووے، 'میں اپنی پگا چلیاں، جیوندے جی تینوں متھے نہیں لگن دتا۔' اِک رشتے دار بڑھی دی کہی ایس گل، “پردیپ کمار اینی چھیتی مرن والا نہیں سی، دھی نے لے لیا'' نے منیشا نوں کافی دکھی کیتا سی۔ سنیتا دے دل تے گہری سٹ وجی سی۔ پتی دا ساتھ سہارا سدا لئی مک گیا سی... منیشا نے موم دا ڈھارس بنھایا.... تے اسدا سہارا بن گئی... موم دے سوگ وچوں باہر آؤن تے اوہ مڑ شوآں چ رُجھ گئی سی۔ وین نال کم کردیاں منیشا اوس دیاں ڈزائیننگ تے میکئپ سبندھی وشیشتاواں توں علاوہ اک ہور وشیشتا بارے وی جان چکی سی۔ اوس نے فیشن میڈیئے دے اہم ویکتیاں تے شو پروڈیوسراں نال نیڑلے سبندھ بنائے ہوئے سن۔ پر اوہ محنت کرن کراؤن دا اصولی وی سی۔ ملان دے تن روزہ فیشن سیمینار تے شو دیاں تیاریاں 'چ اوس نے منیشا تے چوکھا سماں لایا سی....رینپ تے ٹردیاں انداز نوں شوخ بناؤن اتے رینپ دے اخیر تے کھلو کے بدن نوں سجے کھبے گھماؤن ویلے اوورپوزنگ دی پریکٹس کروائی سی۔ فیشن شو والی شام وین نے منیشا دا میکئپ کول کھلو کے کروایا سی۔ تیار ہو کے منیشا نے خود نوں بہکونی شیشیاں وچیں تکیا سی... والاں نوں سر دے کھبے پاسے ولوں لپیٹ کے، سجے پاسے سجایا جوڑا، ڈھکویں شیڈوء نال سنواریاں پلکاں ہیٹھ کھچ پاؤچ موٹیاں نزاکتی اکھاں، لال لپسٹک نال شنگارے لرزدے ہونٹھ... نین نقشاں دے کلاسکی سمیل وچوں انوٹھا حسن ڈلھکاں مار رہیا سی۔ اوس دے بدن تے کریم رنگ دی کاکٹیل ڈریسیل، گل وچ سونے دی پتلی چین، پیراں وچ کالے تے سنہری بدھریاں والے سینڈل تے ہتھ وچ کالا پرس سی۔ منیشا نوں باقی ماڈلاں اپنے توں نکیاں تے فکیاں جاپیاں سن۔ اوس دے رینپ تے جان توں پہلاں وین نے مان نال کیہا سی، “منیشا! یو آر لوکنگ سپرب... دمکدا تھرکدا حسن وی تے ناریتو والی چھب وی۔” رینپ دے دونیں پاسیں بیٹھے اٹلی دے وپاری تے سیاسی، دوروں نیڑیوں آئے فیشن شاستری، میڈیاکار، شنگار سمگری دیاں کمپنیاں دے نمائندے تے فیشن میگزیناں والے عش عش کر اٹھے سن۔ پیشکاری مکن تے خوشی 'چ اچھلدی منیشا نے وین نال چمن سانجھا کیتا سی۔ فیشن انڈسٹری دیاں نامور ہستیاں نے 'گورجیئس بیوٹی' آکھدیاں اوس نوں مان نال چمیاں سی۔ کور گرل، ہیلو اتے کاسموپالٹن میگزیناں والیاں، اوس دیاں تصویراں تے آرٹیکل چھاپن دیاں پلاناں بنائیاں سن۔ پرسدھ کمپنی 'لوریئیل' دے نمائندے ولوں اس تے کریماں، مسکارے تے آئی شیڈوء دیاں ایڈاں بناؤن دی پیش کش آئی سی۔ شو دے انت تے جدوں منیشا تے وین حال توں باہر آئے تاں اوہناں نوں 'سٹاپ رونچی نیس سنستھا' دیاں ممبر دکھائی دتیاں۔ پہلے شوآں وانگ اوہ سنستھا ولوں چھاپے نکے نکے کتابچے ونڈ رہیاں سن۔ اک کڑی دے مونہوں، “کیہ توں منیشا اے؟'' سن کے اس نے 'ہاں' کیہا۔ کڑی نے اک موٹی کتاب پھڑائی تے آکھیا، “جینیفر نے بھیجی اے۔ اوس دے پی.ایچ.ڈی. دے تھیسس 'فیشن اینڈ دا رونچ کلچر' دی کاپی اے۔ منیشا نے دھنواد کیتا تے وین نال ٹیکسی 'چ جا بیٹھی۔ پیرس دے فیشن شو 'چ پھسویں مقابلے ہوئے سن۔ منیشا، سنڈی کارلٹن تے کجھ ہور ماڈلاں نوں بکنیاں 'چ پیش ہون لئی کیہا گیا سی... رینپ تے آ کے ہر ماڈل اپنی دیہی بھاشا راہیں، دوجیاں نالوں ودھیا ہون دا دعوہ کر رہی سی۔ ماڈلاں دے دو گروپ بنائے گئے سن، اک یورپ دا تے دوجا اتری امریکہ دا۔ اتری امریکہ گروپ وچوں منیشا تے سنڈی ودھیا آنکیاں گئیاں سن۔ ووگ، ڈیور، ٹچ تے شیپ ورگے نامور میگزیناں ولوں اوہناں نال فوٹو شوٹو دے پروگرام الیکے گئے۔ 'ووگ' دے فوٹو شوٹو 'چ منیشا نے وکھ وکھ ڈزائیناں دیاں بکنیاں تاں پا لئیاں سن پر کامک اداواں والے پوز دین توں نانہہ کر دتی سی، جدوں کہ سنڈی نے اجیہے پوز خوش ہو کے دتے سن۔ تے پھیر چھوٹے وڈے میگزیناں دی لمی لڑی چل پئی سی، جیہناں وچ کدی منیشا تے کدی سنڈی دے ماڈلنگ دیاں پراپتیاں، تصویراں سہت چھپدیاں رہندیاں۔ منیشا نوں 'ریولون' دیاں لپسٹکاں تے نہوں پالشاں دیاں ایڈاں اتے سنڈی نوں 'میبلین' دی شنگار سمگری دیاں ایڈاں مل گئیاں سن۔ دوناں دی چرچہ دور دور تک پھیل چکی سی۔ آخر 'السٹریٹڈ سوم سوٹ' اتے 'وکٹوریا سیکرٹ ماڈل' والیاں، دوناں نوں چوٹی تے پہنچا دتا۔ ہن تک اوہناں دوناں دیاں تصویراں تے آرٹیکل تقریباً تن تن سو میگزیناں 'چ چھپ چکے سن۔ اینے میگزیناں 'چ چھپن، چوٹی دے فیشن ڈیزائنراں نال کم کرن اتے پرسدھ کمپنیاں دیاں ایڈاں کرن دے پہلوآں دے آدھار تے جو مشہوری دا گراف بندا سی، اس انوسار منیشا تے سنڈی برابر تے سن۔ اتری امریکہ دی ٹاپ ماڈل دوناں وچوں موہرے نکلن والی نے بننا سی۔ اوائی ایہہ سی کہ نیویارک دے ہون والے وڈے شو تک، مشہوری دی دوڑ وچ اک جنی موہرے نکل جائے گی۔ منیشا دی اک ماڈل سہیلی نے اوس نوں 'پلیبوای' میگزین 'چ نیوڈ چھپوا کے مشہوری دا گراف اتانہ لجان دی صلاح دتی سی پر منیشا نے سر پھیر دتا سی۔ ایہہ گل جدوں اوس نے وین نوں دسی تاں اس کیہا سی، “منیشا! زمانہ نگن تے کام اکساؤ ماڈلنگ دا آ گیا اے...'اے ون' ایجنسی دے نویں ڈیزائینر کرے گ دے ڈیزائین کیتے 'پش اپ برا' بارے تینوں پتہ ای اے۔” “ہاں پتہ اے۔ اوہی برا مشیل نوں پوا کے تے 'میکسما' میگزین 'چ اوس دے نیوڈ چھپوا کے کرے گ نے ہی تاں مشیل نوں مشہور کیتا اے۔'' “ادھیاں چھاتیاں باہر دکھاؤن والا اوہ برا، مارکٹ 'چ لوکاں دی پسند بن گیا۔ بناؤن والی کمپنی نے ملیئنز ڈالراں دا بزنس کیتا۔ تے 'اے ون' ایجنسی جونسی عام جیہی ہوندی سی اج ٹوپ تے پہنچ گئی اے۔'' “پر وین! آخر ٹکنا تاں کلا نے ہی اے۔'' منیشا نے آکھیا سی۔ “منیشا! توں جاندی ایں میں اج تک کلا توں مونہہ نہیں سی موڑیا پر ہن میں دیکھداں کہ جے کلا نال ہی بجھا رہیا تاں کرے گ ورگے ڈیزائنراں توں بہت پچھے رہ جاواں گا۔'' منیشا نے اپنے اندر جھاکیا سی۔ کلا گورو برقرار سی۔ پر جدوں سینڈی نے 'پلیبوای' 'چ نگن تصویراں چھپوا کے ٹاپ ماڈل دا ٹائیٹل جھپٹیا تاں منیشا دا کلا گورو جھمبیا گیا سی...۔ 'کوئی نہیں منا! اگلی وار سہی۔' دھیرج دھردیاں اوس نے بھوکھ تے ٹیک رکھ لئی سی۔ تے پھیر آ گیا سی لاس اینجلس دا وڈا فیشن شو۔ شو بارے فون تے خبر دیندے وین نے کیہا سی، “منیشا! ایس شوچ تینوں ٹاپ ماڈل بناؤن لئی میں ڈٹ کے زور لاواں گا، توں ڈزرو...۔'' فون دی گھنٹی نے منیشا نوں اتیت وچوں ورتمان 'چ لے آندا... وین بول رہیا سی، “ہائ منیشا! تیری کال رٹرن کر رہیاں۔'' “آ گیا چیتا۔'' منیشا ہرکھ نال بھری پئی سی۔ “سوری منیشا! تیریاں دوناں کالاں سمیں میں میٹنگاں 'چ سی، پہلاں کوآرڈنیٹر تے پھیر شو پروڈیوسراں نال تے ہن ڈومنکا دا فوٹو شوٹو... '' “وھٹ؟''منیشا نوں جیویں ٹھونہے نے ڈنگ ماریا ہووے۔ “ڈومنکا دا 'ووگ' نال فوٹو شوٹو کروا رہیاں۔'' منیشا دے کالجے ہول پیا۔ اوس دے کناں وچ سویرے ایوا دی کہی گل، 'وین ڈومنکا نوں چک رہے' گونج گئی۔ پرسدھ فیشن میگزین 'ووگ' 'چ ڈومنکا دیاں تصویراں چھپن نال اوس دی چڑھت نوں اوہ پلاں وچ ہی چتو گئی۔ تنکویں آواز 'چ بولی، “توں سویریے نہیں دسیا۔'' “ادوں اجے 'ووگ' ولوں ہاں نہیں سی ہوئی۔ خیر توں دس کیہ گل اے؟'' “مینوں پتیاں والی آئیٹم توں چھوٹ چاہیدی اے۔'' تناء چ مدھی ہوئی منیشا نے آکھیا۔ “ہولی سموک! توں اجے اسے چکر 'چ پھسی پئی ایں۔ بہت ماڑی گل اے،'' حیرانی تے ہرکھ پرگٹاؤندا وین بولیا، “تینوں چنگا بھلا پتے کہ ایہہ شو میرے تے ایجنسی لئی ہی نہیں، تیرے لئی وی اہم اے۔ تیرا ٹوپ ماڈل دا معاملہ اے۔ جے عام جیہا شو ہوندا تاں میں چھوٹ دے دیندا... تینوں ایہہ آئٹم کرنی ہی پینی ایں۔'' “پر میرا دل نہیں مندا۔'' “من جائے گا۔ میں اینا نوں فون کر دینا، اوہ میروآنا پھڑا جائے گی۔'' ایس نشے دی عادی ہو چکی اینا اسے ہوٹل 'چ ٹھہری ہوئی سی۔ وین دے سخت لحظے اتے ڈومنکا دی چڑھت دے ساڑے نے منیشا اندر روہ بھر دتا... اوس نوں وین دیاں ڈومنکا نال نزدیکیاں بارے پتہ تاں سی پر چنتا نہیں سی... وین کُھلی زندگی جیو رہیا سی۔ پہلاں وی دو کو ماڈلاں نال اوس دی نیڑتا بن چکی سی۔ اک ماڈل نے تاں ایہہ چکر چلایا ہی منیشا دی 'نمبر اک' پوزیشن کھوہن واسطے سی پر وین نے اوس دی چال چلن نہیں سی دتی۔ پرنتو ہن ڈومنکا دے معاملے 'چ اوہ رضامند ہویا جاپدا سی۔ ایس پچھے اسدا منتو وی منیشا نوں نظر آ رہیا سی نگنتا کامکتا والیاں آئیٹماں نوں چامھل چامھل کے کرن والیاں ڈومنکا ورگیاں حسین ماڈلاں نوں اگے لیا کے، وین بزنس دے اپرلے جوڑاں وچ پہنچنا چاہندا سی۔ 'چڑھا لوے اپنی بزنس دی گڈی تے پھکن ڈومنکا دی وی... دا ہیل ود دیم۔' منیشا دا روہ ودروہ 'چ بدل گیا۔ اوس نے شو 'چ بھاگ نہ لین دی سوچ لئی اتے وین تے ایرک نوں کڑکویں ای میل لکھن لئی لیپ ٹاپ اٹھا لیا۔ اسی پل دروازے تے دستک ہوئی۔ اوس نے دروازہ کھولیا۔ اینا سی۔ میروانا والا لفافہ پھڑاؤندیاں اوہ بولی، “ہے منیشا! ایتکیں نہ جان دئیں ٹاپ ماڈل دا ٹائیٹل، پورا زور لا دے...گڈ لک۔'' اینا دی شبھ کامنا نے منیشا نوں موم دی شبھ کامنا یاد کروا دتی۔ سویرے گھروں ترن ویلے موم نے کیہا سی، “بھگوان تیرا ٹاپ ماڈل دا سپنا پورا کرے۔'' سپنے دی پورتی چتودیاں منیشا نے موم نوں جپھی پا لئی سی۔ تے ہُن اس سپنے نوں پیندے جھٹکیاں کارن جاں پتہ نہیں کویں منیشا اندرلی دوجی منیشا جاگ پئی، 'جا کے موم نوں کیہ دسن گی؟... شو وچوں ایس طرحاں غیرحاضر ہونا کانٹریکٹ اتے ایجنسی دے نیماں دی النگھنا ہے۔ تیری جوب جا سکدی اے۔ وین تے ایرک تیرے تے ہرجانے دا مقدمہ کر سکدے نیں... اینی جدوجہد کیتی تے آخر کھٹیا کی؟ پچھلی واری توں سنڈی توں بازی ہاری، ہن آپ ہی مشیل واسطے میدان چھڈ رہیں ایں۔ تے دیکھ لئیں، اگلی بازی ڈومنکا مار جائے گی۔' 'ایہو جیہیاں بعضیاں میرے لئی کوئی معنے نہیں رکھدیاں۔' اوس دے کلا گورو نے سر چک لیا۔ 'تاں پھیر ہوئی جان دے، جو کجھ ہوندا اے۔' 'وٹھ اے ہوربل ڈے۔' دبدھا 'چ نپیڑ ہندی اوہ بڑبڑائی۔ اوس دی سوچ وچ اچانک ہی پتا تے پتی آ کھلوئی... طعنے جہے دیندے جیویں کہہ رہے ہون، 'دیکھ لیا جلوا ماڈلنگ دا، مار لئے معرکے؟' منیشا دی دھون دیاں ناڑاں دا کساء سر 'چ پہنچ رہیا سی۔ اوس نے دوناں ہتھاں نال سر گھٹ لیا پر سر پاٹدا جا رہیا سی... اوس دے ہتھ میروانا ول ودھ گئے۔ چھیتی ہی اوس نوں اتشاہ دے ہلارے محسوس ہون لگ پئے... رہرسل دا ٹائم ہو رہیا سی۔ اوس نے ضروری چیزاں بیگ وچ پائیاں تے ٹیکسی لے کے حال 'چ پہنچ گئی... جگمگا رہے شاندار حال وچ بنے لمبے چوڑے رینپ دوالے بیٹھے وڈے وڈے وپاری، میڈیاکار، فیشن ساشتری، سرکاری مہمان، ہالیوڈ دے کجھ سٹار تے چونویں درشک شو شروع ہون دی اڈیک وچ سن۔ ٹاپ ماڈل دا فیصلہ کرن والے جج اک وکھری کیبن 'چ بیٹھے سن۔ اوہ پنج سن۔ اتری امریکہ دی مشہور وستر کمپنی 'گریس' دا مالک روبن جلویگر، وین فلپ، اک ہور فیشن ڈیزائینر، ہالی وڈ سٹار لینا ہینڈرسن اتے پچھلی وار دی ٹاپ ماڈل سنڈی کارلٹن۔ چیئرپرسن جلویگر سی۔ شو شروع ہویا۔ پہلی آئیٹم پول ڈانس دی سی، جس وچ سنڈی، ڈومنکا تے ہور ماڈلاں نے کامکتا دی خوب ہلری پائی۔ اگلیاں آئٹماں وچ ماڈلاں اپنے اپنے فیشن ڈیزائنراں دیاں تیار کیتیاں نویاں نویکلیاں پشاکاں 'چ سج کے پیش ہوئیاں۔ مشیل نے پوری واہ لائی پر اوس دی اتی بے باک شیلی منیشا دی سہج مئی شیلی جنا ڈونگھا پربھاو نہ پا سکی۔ آخری آئیٹم پتیاں والی سی۔ منیشا اندر کمبنی چھڑ پئی۔ پردے نال میروانا دے سوٹے لا کے اوہ کجھ قایم ہو گئی۔ عام ماڈلاں توں بعد مشیل رینپ تے چڑھی۔ خرمستی وچ اسدا انگ انگ نچ رہیا سی۔ بہکویں انداز وچ چھاتی دے دوناں پتیاں نوں انگلاں نال الاردیاں، اوہ اپنی گیم دے پتے پورے زوش نال کھیڈ رہی سی۔ مشیل توں بعد منیشا دی واری سی۔ اوہ رینپ تے مٹک نال ٹر رہی سی پر نگنتا دا بوجھ اس توں اٹھایا نہیں سی جا رہیا۔ اندروں اٹھے بول، 'چل نیں جندے' اس نوں کجھ حوصلہ جیہا دے گئے... میروانا نے مقابلے دا جوش دتا... شرم نزاکت 'چ بدل گئی۔ تے نزاکت رنگی مٹک نے اک انوٹھا ہی پربھاو سرج دتا۔ ...شو دے انت وچ پرمکھ ہستیاں نے اپنے بھاشناں وچ ایس شو دی خوب تعریف کیتی... اوس نوں، فیشن شوآں دے کھیتر وچ نویں آیام جوڑن والا فیشن شو آکھیا۔ تے پھیر ٹاپ ماڈل دا اعلان کرن لئی روبن جلویگر سٹیج تے آ حاضر ہویا۔ منیشا نوں اپنی اک اک آئیٹم دی پیشکاری تے تسلی سی، وشواس سی۔ اوہ اپنے سپنیاں دے کھنبھاں تے اڈ رہی سی پر جلویگر دے سنائے فیصلے نے اوس دے سپنے فناہ کر سٹے۔ آکاش 'چوں پتال 'چ جا ڈگی سی اوہ... چارے پاسے ہنیرا ہی ہنیرا سی۔ اوس دے سیل فون دی گھنٹی وجی، وجی گئی۔ اوس نے کوئی ہنگارا نہ بھریا۔ دوجی وار پھر...۔ جدوں تیجی وار فون کھڑکیا تاں کسیس جیہی وٹدیاں اوس نے فون چکیا تے مرنؤ آواز وچ “ہیلو'' کیہا۔ “ہائے منیشا! میں ایوا بول رہی ہاں، کون بنی ٹاپ ماڈل؟'' “کتی مشیل۔'' منیشا نے وس گھولی۔ “مینوں پہلاں ہی پتہ سی۔'' “کویں؟'' “سویرے جدوں میں ہوٹل موہرے تینوں ملی سی، ادوں مشیل دی سپائیئنگ کر رہی سی۔ تیرے کولوں اٹھ کے میں ایہدا پچھا کیتا، ایہہ روبن جلویگر کول گئی سی، دیہی جشن مناؤن۔'' تے ایوا دا فون بند ہو گیا۔ “بلڈی بچ...۔”بے سرتی جیہی 'چ، کرسی تے ڈھٹھی منیشا نوں پتہ نہیں سی لگ رہیا کہ اوہ مشیل نوں کوس رہی سی جاں اسدا کلا گورو اوس نوں آپوں نوں کوس رہیا سی...۔ (اُلتھا: ایم آصف)