ارشد سیماب ملک
Arshad Seemab Malik

Punjabi Kavita
  

Taaruf Arshad Seemab Malik

تعارف ارشد سیماب ملک


اصل ناں ملک محمد ارشد اے۔پیو دادے دا تعلق وادی سون سکیسر تو ں کجھ مِیل دی دوری تے اک پنڈ پیل دے اک اعوان زمیندار خاندان دے نال اے۔ جنھاں دا گزرے وقتاں وچ پنڈ دی سیاست وچ حصہ رئیا۔
ابا جی ملک دوست محمد برطانوی راج وچ فوج دے و چ بھرتی ہوئے۔دوجی عالمی جنگ وچ برمادے محاز اُتے جنگ لڑنیاں جاپانی قیدی ہوئے تے ساڈھے ترے سال قید کٹی۔پاکستان بنن توں بعد محکمہ پولیس چ لاہور توں بھرتی ہوئے۔
1948ء وچ اُنھاں دا تبادلہ کیمبل پور وچ ہویا تے اِتھے اسی شہروچ اباد ہوگئے، جتھے ۵۱ مارچ 1969ء نوں انہاں دا جنم ہویا۔ماں دا تعلق کیمبل پور دے پنڈ ڈھیر اک اعوان زمیندار خاندان نال اے۔
1986ء وچ میٹرک کیتا بعد وچ کمپیوٹر وچ ڈپلومہ کیتا۔مصوری دا شوق نکے ہونیاں دا سی بعد چوں مشہور آرٹسٹ لال جی دے کول کجھ دیہاڑے لاکے مصوری دا شوق پورا کیتا۔گورنمنٹ پائیلٹ سکول دی بیڈ منٹن ٹیم دا حصہ رہے نے،کجھ عرصہ کالج و چ پروفیسر مختیار اعوان تے جمیل رضا ء اوراں دے نال بی بیڈ منٹن کھیڈدے رئے۔1989ء تے1991ء وچ آل اٹک اوپن بیڈمنٹن ٹورنمنٹ دے سنگل تے ڈبل دوئیں ٹائٹل جتے نے۔
1995ء و چ اردو نظماں لکھ کے شاعری دا ٓغاز کیتا۔پر جلد ای افسانہ تے تحقیق ول آگئے۔احمد ندیم قاسمی دے رسالے فنون،ادبیات،ماہ نو،روشنائی، مشعل، قندیل تے کجھ ہور رسالیاں دے وچ افسانے تے مضمون چھپدے رئے۔2000ء وچ کیمبل پو(ر اٹک)دی ادبی تنظیم ”قندیل ِادب“دے نال جُڑے۔2002ء و چ قندیل ادب دے معاون سیکٹریری بنا دتے گئے۔بعد چوں اسی تنظیم دے رسالے ”قندیل“ دے اڈیٹر بنے۔ اس رسالے و چ لکھنے والیاں دے وچ ڈاکٹر وزیر آغا،ڈاکٹر انورسدید،نذر صابری،پروفیسر فتح محمد ملک،ڈاکٹر رشید امجد،منشایاد،ڈاکٹر مرزا حامد بیگ،محمد اظہار الحق،حمید شاہد،ڈاکٹر ایوب شاہد،ڈاکٹر ناصر عباس نیر،محسن بھوپالی،نثار اکبر آبادی،شبنم بخاری،ڈاکٹر روش ندیم،ڈاکٹر عبدالعزیز ساحر تے ہو ر کئی مشہور لکھنے والے شامل سن۔
2006ء توں مقامی بولی کیمبل پوری وچ کہانیاں تے مضمون لکھن شروع کیتے۔انہاں دیاں کہانیاں تے مضمون اٹک توں چھپن والے پنجابی رسالے”ونگاں“ تے دوجے رسالیاں وچ چھپدے رئے۔۲۱۰۲ء وچ ”تذکرہ شعرائے اٹک“دے ناں نال کتاب چھپی جس دے وچ ڈیڈھ سو شاعراں دے کلام تے حالات بارے جانکاری ملدی اے۔ جنوری ۹۱۰۲ ء دے وچ ضلع کیمبل پور (اٹک)دے اردو افسانہ نگاراں اُتے ”دستاویز“ دے ناں نال کتاب چھپی اے جو کیمبل پور دی افسانوی تاریخ اُتے پہلی کتاب اے جس دے وچ کیمبل پور دے پہلے کہانی کار امر سنگھ منصور(پ۔1888۔1948) انہاں دی تیسری کتاب مقامی بولی کیمبل پوری دے چھاچھی لہجے وچ کیمبل پور (اٹک) دی تاریخ، ثقافت تے ادب بارے چھپن لئی تیار اے۔اس توں علاوہ مقامی بولی کیمبل پوری دے چھاچھی لہجے و چ کہانیاں دی کتاب ”سانجھ“ بی چھاپن دے انتظار چ ہیگی۔جنوری ۹۱۰۲ء توں سید نصرت بخاری دے نال رل کے کیمبل پور(اٹک) توں ”ذوق“ دے ناں نال اک اردو رسالہ جاری کیتا جس دے اڈیٹرنے۔ایس رسالے دے ہن تیکر دو شمارے چھپ چکے نے جس نوں انڈو پاک وچ بوہتا پسند کیتا جا رئیائے۔

کیمبلپوری چھاچھی بولی بارے

ارشد سیماب ملک اوراں دیاں اے کہانیاں کیمبل پوری زبان دے چھاچھی لہجے وچ ہن۔اے لہجہ پنجابی دے سارے لہجیاں توں وکھ اپنی شناخت رکھدا اے۔ایہ بولی کیمبل پور دے علاقہ چھچھ دے اک سو توں ودھ تے کیمبل پور دے کئی ہور دیہاتاں وچ بولی جاندی اے۔یاد رہوے جے علاقہ چھچھ کئی ہزار سال توں اپنی تاریخی تے تہذیبی حیثیت رکھدا اے۔ ایس بولی دی شناخت بارے پہلی واری ڈاکٹر ارشد محمود ناشاد اوراں نے علامہ اقبال اوپن یونی ورسٹی دے ایم اے دے نصاب لئی ہک بھرواں مقالہ ”چھاچھی بولی“لکھ کے پنجابی زبان وچ ایس بولی دی شناخت دا مڈھ لایا اے۔ایس توں پچھوں کیمبل پوری زبان وچ اک لغت چھاپی جہنوں حال ہی وچ لہور توں پنجابی ادارے”پلاک“ دے ہیٹھ ”پلاک ڈکشنری“ چھپن والی دنیا دی سب توں وڈھی پنجابی ٹو پنجابی لغت وچ شامل کیتا گیا۔تے ہن ارشد سیماب ملک اوری ایس زبان تے علاقے دی تاریخ،ثقافت تے ادب بارے کتابلئی تیار اے۔ایس لہجے دے پہلے کہانی کار ڈاکٹر مرزا حامد بیگ نے دوجے اہم کہانی کاراں وچ پروین ملک،مشتاق عاجزتے توقیر چغتائی دے ناں شامل ہن۔ایس لہجے وچ شاعری دا آغاز اٹھارویں صدی تو پہلوں ہو گیا سی۔چھاچھی بولی بارے مختصر جانکاری لئی ویکھو وکیپیڈیا۔

 
 

To veiw this site you must have Unicode fonts. Contact Us

punjabi-kavita.com