October Ate June
اکتوبر اتے جون او ہینری
کپتان نے کندھ اتے ٹنگی اپنی تلوار نوں اداس نگاہاں نال ویکھیا ۔ نیڑے دی ہی الماری وچّ موسم دی مار اتے سیوا دے کارن گھسی ہوئی اسدی داغدار دھبیدار وردی ٹنگی سی ۔جنگ دے الارماں دے زمانے نوں کنا لمبا سماں گزر گیا پرتیت ہندا سی ۔
اتے ہن جدوں اوہ اپنے دیش دے سنگھرش دے سمیں توں سیوا نورت ہو چکیا سی، اک عورت دیاں کومل تکنیاں اتے مسکراؤندیاں بلھیاں دے پرتی سمرپت ہو کے، سمٹ کے رہِ گیا سی ۔ اوہ اپنے شانت کمرے وچّ بیٹھا سی اتے اسدے ہتھ وچّ اوہ پتر سی جو ہنے ہنے اسنوں پراپت ہویا سی ۔ پتر جسنے اسنوں اداس دتا سی ۔ اسنے اوہناں گھاتک پنکتیاں نوں پھیر پڑھیا، جنہاں نے اسدی آس دا خون کر دتا سی ۔
"اپنی پتنی بنن لئی پچھ کے جو مان تسیں مینوں بخسیا اس نوں ٹھکراؤندیاں مینوں لگدا ہے کہ مینوں صاف سپشٹ کہنا چاہیدا ہے کہ اجیہا کرن دا کارن ایہہ ہے کہ ساڈی عمر وچّ اک وڈا انتر ہے ۔ میں تہانوں بہت، بہت پسند کردی ہاں، پر میرا وشواش ہے کہ ساڈا ویاہ سفل نہیں ہووےگا ۔ مینوں دکھ ہے میں ایہہ گلّ کہہ رہی ہاں، پر مینوں وشواش ہے کہ تسیں امان داری نال سچا کارن دسن دی پرشنشا کروگے ۔
کپتان نے آہ بھری اتے اپنے ہتھاں وچّ اپنا سر تھم لیا ۔ ہاں اوہناں دی عمر دے وچکار کئی سال سن ۔ پر اوہ تکڑا سی، اسدی وکت سی اتے اسدے کول دولت سی ۔ کی اسدا پریم، اسدی کومل دیکھبھال اتے اسنوں اس کولوں ہون والے فائدے، اسنوں عمر دا پرشن نہیں بھلا سکدے سن ؟ اسدے علاوہ، اوہ نشچنت سی کہ اوہ وی اسدی پرواہ کردی ہے ۔
کپتان تتکال فیصلہ لین والا ویکتی سی ۔ اوہ یدھ کھیتر وچّ اپنے فیصلیاں اتے طاقت لئی جانیا جاندا سی ۔ اوہ اسنوں ملیگا اتے اسنوں اپنے ولوں اچیچا زور پائیگا ۔ عمر ! – عمر دا اسدے اتے اسدی معشوق دے وچکار آؤن دا کی مطلب سی ؟
دو گھنٹے وچّ اوہ اپنی مہانتم لڑائی لئی تیار ہو گیا ۔ اسنے پرانی ٹینسی لئی ٹرین پکڑی جتھے اوہ رہندی سی ۔
تھیؤڈرا ڈیمنگ اک پرانی عمارت دیاں پوڑیاں تے کھڑی شام دی دھپّ دا آنند لے رہی سی جدوں کپتان نے پرویش کیتا اتے بجری دے رستے اتے چلدا ہویا اپر آیا ۔
اوہ اسنوں بے باک مسکراہٹ دے نال ملی ۔ جدوں کپتان استوں ہیٹھلی اک پوڑی اتے کھڑا سی اوہناں دی عمر وچّ بہتا انتر نہیں سی لگدا۔ اوہ لمبا، صاف – چمکدار نیناں والا اتے بھوری رنگت دا سی ۔ تے اوہ وی اپنے ٹھاٹھاں ماردے استری جوبن دے سکھر تے سی ۔
"مینوں تہاڈے آؤن کہ آس نہیں سی "، تھیؤڈرا نے کیہا، "پر آ ہی گئے ہو چلو اتھے پوڑیاں اتے ہِ بیٹھدے ہاں ۔ کی تہانوں میرا پتر نہیں ملیا ؟"
"ملیا"، کپتان نے کیہا، " اس لئی تاں میں آیا ہاں ۔ میں کہندا ہاں تھیؤ کہ اپنے جواب اتے پھیر وچار کر، نہیں کرینگی کی ؟"
تھیوڈرا کوملتا نال اسدی ولّ مسکرائی ۔ اوہ واستو وچّ اسدی شکتی، اسدی سالم دکھّ، اسدی مردانگی نوں بہت پیار کردی سی – شاید، جیکر …
نہیں، نہیں ہانمکھی انداز وچّ اپنا سر ہلاندے ہوئے اوہ بولی، "سوال ہی نہیں پیدا ہندا ۔ میں تہانوں پوری طرحاں پسند کردی ہاں پر تہاڈے نال ویاہ کرنا، نہی چل سکنا ۔ تہاڈی اتے میری عمر – میرے توں پھیر مت کہاؤ – میں تہانوں اپنے پتر وچّ دسیا سی"۔
کپتان دے تامبے رنگے چہرے اتے ہلکی لالی چھا گئی ۔ اوہ چپّ سی اتے شام دے پرکاش وچیں اداسی دے نال گھور رہا سی ۔ جنگل دے پار اوہ ویکھ رہا سی جتھے کدے نیلی وردی پائی جوان، سمندر دے ولّ مارچ کردے ہندے سن ۔ اوہ ! ہن ایہہ کنی پرانی گلّ پرتیت ہندی سی ۔ واستو وچّ قسمت اتے کال مہاراج نے اس نال بے رحم کھیڈ کھیڈی سی ۔ اسدے اتے اسدی پرسنتا دے وچکار کجھ کو سال پھس گئے سن ۔
تھیوڈرا دا ہتھ رینگ کے کپتان دے بھورے، مضبوط ہتھ دی پکڑ وچّ تھم گیا ۔ کم اج کم اوہ اوہ احساس تاں ہنڈھا رہی سی جو محبت ورگا ہندا ہے ۔
"مہربان، انا برا نہ مناؤ،" اوہ ششٹتا نال بولی ۔ ایہہ سبھ ساڈے بھلے لئی ہے ۔ میں آپ اسدا نچوڑ سوچ سوچ کے عقل مندی نال کڈھیا ہے ۔ کسے دن تہانوں خوشی ہوووگی کہ میں تہاڈے نال ویاہ نہیں کرایا ۔ ایہہ کجھ سمیں لئی بہت اچھا اتے پریممئی لگیگا – پر ذرا سوچو ! تھوڑے ہی سالاں وچّ اسدا سواد کنا بھنّ ہووےگا ۔ ساڈے وچوں اک جنا شام دے سمیں اگّ دے کول بیٹھ کے پڑھنا چاہیگا اتے ہو سکدا ہے کہ گٹھیئے بگیرا دے اپچار کر رہا ہووےگا جدوں کہ دوجا ناچ تھئیٹر اتے دیر رات دے بھوجن دے پرتی پاگل ہو رہا ہووےگا ۔ نہیں، میرے پیارے متر ! ایہہ جنوری اتے مئی دا نہیں سگوں اکتوبر اتے جون دا اصلی معاملہ ہے !"
"میں ہمیشاں اوہی کراں گا تھیؤ جویں توں چاہینگی توں.."
"نہیں، تسیں نہیں کروگے ۔ تسیں ہنے سوچدے ہو کہ تسیں کروگے، پر تسیں نہیں کروگے ۔ کرپا، میرے کولوں زیادہ نہ پچھو ۔"
کپتان اپنی لڑائی ہار گیا سی ۔ پر اوہ اک ویر جودھا سی اتے جدوں اوہ اپنی آخری وداع کہن لئی اٹھیا، اسدا منہ چبا جیہا ہو گیا سی اتے موڈھے ڈھیلے جہے ۔
اس رات اسنے اتر دشا لئی ٹرین پھڑی ۔ اگلی شام اوہ اپنے کمرے وچّ واپس سی، جتھے دیوار اتے اسدی تلور لٹک رہی سی ۔ اوہ بھوجن لئی تیار ہو رہا سی اتے اپنی سفید ٹائی ساودھانی نال بنھ رہا سی اتے اس سمیں اوہ اپنے آپ نال گلاں وی کردا جا رہا سی ۔
'میرے وچار وچّ، اوڑک، تھیؤ ٹھیک ہی کہندی سی ۔ کوئی مکر نہیں سکدا کہ اوہ روپ وتی مٹیار ہے پر بہت رہمدلی نال وی انومان لایا جاوے تاں اوہ اٹھائیاں دی تاں ہونی ہی ہے ۔
کیونکہ تسیں جاندے ہی ہو، کپتان صرف اننی سال دا سی اتے اسدی تلوار چیٹانوگا دے پریڈ گراؤنڈ وچّ ٹریننگ دے علاوہ کدے میانوں نہیں سی کڈھی ۔ یعنی اوہ سپین – امریکہ جنگ دے کدے کدے نیڑے توں نہیں سی لنگھیا ۔
