سڑکاں جرنیل سنگھ
ہائی وے کیو. ای. ڈبلیو. ویسٹ اتے، بناں ٹریلر، ٹرک لئی
جا رہیا اجیت سنگھ مسیساگا لنگھ چکا سی۔
بے شمار واہناں دے شور وچ اوس نوں اپنی گھٹن ودھدی
پرتیت ہو رہی سی۔ گھٹن، جو پچھلے چار پنج مہینیاں توں
لگاتار اوس دے تن من نوں نپیڑدی چلی آ رہی سی۔ کل دا تاں
اوس نے اجیت سنگھ نوں زیادہ ہی ویاکل کیتا ہویا سی... کل
کرن دا جنم دن سی، پچیواں جنم دن۔ کنی اداس سی کل دی
سویر... گم گوتے کھاندا اجیت سنگھ تیار ہو کے، نت وانگ،
اپنے ٹرک دفتر نوں تر گیا سی۔ جیک دی دیکھ ریکھ ہیٹھ کم
ٹھیک ٹھاک چل رہے سن۔ مکانکی جہے رؤں 'چ اوس نے
اپنے ٹرکاں دا روزانہ جائزا لیا، اگلے دن دی ڈسپیچ تیار کیتی
تے جیک نوں دس کے گھر پرت آیا۔ پتنی نال روٹی کھاندیاں
اوس نے کرن دے جنم دن بارے کوئی گل نہ کیتی۔ سریندر
کور وی چپ سی۔
روٹی کھا کے اوہ لاگلے پارک 'چ جا بیٹھے۔ تازی ہوا تے
ہریاول وچوں کجھ چین ملی۔ پر کجھ ہی دیر بعد اوہناں دے
مناں وچ بیابان شوکن لگ پیا... پتہ نہیں کنا چر اوہ اندرلی
توڑاکھوہی 'چ چپ چاپ پنج ہندے رہے۔ تے پھیر چپ جیویں
اسیہہ ہو گئی... اجیت سنگھ لفظاں نوں ٹولھن لگا، ''سریندر!...
کوئی گل کر۔''
''کیہڑی گل کریئے؟'' پرانہہ درختاں دے جھوم رہے ٹاہناں
اتے ہس کھیڈ رہے گبھروآں ول دیکھدیاں سریندر کور دا غم
جیویں ہور گہرا ہو گیا ہووے، ''سویر دا من 'چ کرن ہی گھمی
جاندے... پچھلے سال اوہدے جنم دن تے جدوں آپاں کارڈ پھڑا
کے اوہدا متھا چمیاں تاں کنا خوش ہویا سی اوہ۔ دو تن وار کیہا
ہونے ممی! ڈیڈی! تسیں بہت چنگے آں... آئی لو یو بوتھ۔ تے
اج... '' سریندر کور دی آواز بھرڑا گئی۔ اوس دے ہنجو ویکھ
کے اجیت سنگھ دیاں اکھاں وی چھلک پئیاں...
شامیں کلیولینڈ توں ڈرائیور بِندر دا فون آ گیا، ''انکل! میرا
ٹرک خراب ہو گیئے۔ رپیئر ہون نوں تن چارن دن لگ جانے
آں۔ فروٹ دا لوڈ اے... کل تک ٹرانٹو پہنچنا چاہیدے۔ کوئی بندہ
ٹرک دے کے بھیجو۔''
''بندر! توں مینوں ادھے گھنٹے بعد فون کریں۔'' فون رکھ
کے اجیت سنگھ سوچن لگ پیا... سارے ڈرائیور بزی سن۔ اسدا
ہتھ جیک دا فون نمبر دباؤن لئی ودھیا پر رک گیا، 'جیک 'کلا
کدھر کدھر... ' اوس نوں اپنی ستھتی تے کھجھ جیہی آ گئی۔
اسدا دل کیتا کہ بِندر نوں کہہ دیوے، 'جو ہوندا اے ہوئی جاوے۔
ٹرکاں اتے لوڈاں دے ایس کھل جگن 'چ میں بہت تھک گیا ہاں۔'
پر جدوں دوبارہ بِندر دا فون آیا تاں اس اندرلے پیشاور ٹرکر
کولوں انج کہہ نہ ہویا۔ اوہ آکھ رہیا سی، ''بئی! میں آپ ہی آواں
گا۔ سویرے ساجھرے ادھروں چل پؤں گا۔''
دودھ دا گلاس پی کے اجیت سنگھ بیڈ تے پے گیا سی۔ اک
دوک ٹھونکیاں توں سوائ، نیند اس توں پرے پرے ہی سرکدی
رہی... اوس دی سوچ وچ مڑ مڑ کرن گھمدا رہا... اچا لما،
کنکونا، مسکرا مسکرا کے گلاں کرن والا کرن... بیڈ کول
پئے کلاک دے، ہنیرے 'چ چمکدے، ڈجیٹل ہندسے سمیں نوں
اگانہہ لجا رہے سن۔ پر اجیت سنگھ دا من پچھانہہ نوں اڈدا جا
رہیا سی... ساری رات اوہ سڑکاں دے جنگل وچ بھٹکدا رہیا...۔
اجیت سنگھ دا سڑکاں نال ناطہ انڈیا 'چ ہی بن گیا سی۔
پڑھائی 'چ خاص دلچسپی نہ ہون کارن اوہ کالج چھڈ کے
ٹیکسی چلاؤن لگ پیا سی۔ اسے دوران اوس دے وڈے بھرا
رتن سنگھ نے مدھ پردیش 'چ ٹرک ڈرائیوری کردیاں دو ٹرک
بنا لئے سن۔ اوس نے اجیت نوں اپنے نال کم کرن لئی پچھیا
تاں اجیت نے ہاں کر دتی۔ بھرا دا کاروبار ودھاؤن لئی اوس
نے دن رات اک کر دتا۔... پنج کو سالاں 'چ ہی رتن سنگھ دے
ٹرکاں دی گنتی دو توں چھ ہوو گئی سی۔ اجیت نوں آس سی کہ
'ہندل ٹرانسپورٹ کمپنی' دے ٹرکاں اتے بھرا دے ناں نال، اک
دن اسدا ناں وی ہووےگا۔ پر جیوں جیوں سماں بیتدا گیا، تیوں
تیوں اوس دی ایہہ آس مدھم پیندی گئی۔ اوس نے بھرا نوں کئی
وار کیہا کہ کمپنی وچ اوہ اسدا جے بہتا نہیں تاں تھوڑا کو
حصہ ہی رکھ لوے۔ رتن سنگھ ''کوئی نہیں، دیکھدے آں۔'' کہہ
کے سار دیندا۔
آخر اجیت سنگھ دا صبر جواب دے گیا... بھراواں وچکار
خون کھرابا ہوندا ہندا بچیا۔ ماں پیو وی ٹرانسپورٹر پت دی ہاں
وچ ہاں ملا رہے سن۔ ہرکھے ہوئے اجیت نے اپنے حصے دی
زمین گہنے کیتی... تے کنیڈا پہنچ گیا۔
سال کو بعد ہی کنیڈا سرکار نے لک چھپ کے رہندے
لوکاں دے کیس وچارن دا اعلان کر دتا۔ اجیت سنگھ دا کم وی
بن گیا۔ ٹیمپریری جیہی جوب چھڈ کے اوس نے ٹرک دا
لائیسینس لیا تے اپنے من پسند کتے نال جڑ گیا۔
اجیت سنگھ توں ڈیڈھ کو سال بعد سریندر کور تے نیانے
وی پہنچ گئے۔ اجیت سنگھ دا دھرتی تے پیر نہ لگدا... اوس
نے سریندر نوں اک فیکٹری دی جوب لبھ دتی تے نیانے پڑھن
لا دتے لکھی چھویں تے کرن چوتھے گریڈ 'چ۔
اجیت سنگھ ہیملٹن پہنچ چکا سی۔ اوس نے اک گیس سٹیشن
توں ٹرک 'چ ڈیزل بھریا تے کجھ کھان پین لئی وی لے لیا۔
اونٹیریؤ جھیلیریؤ ولوں آؤندی تازی ٹھنڈی ہوا 'چ گرمی توں
راحت محسوس کردیاں اوہ، ٹرک کول کھڑا، جوس پی رہیا سی
کہ گیس سٹیشن کولوں لنگھدی سڑک اتے لگا سائین بورڈ اوس
دی سوچ نوں اتیت ول لے اڈیا... نویں نویں کنیڈا پہنچے اپنے
ٹبر نوں 'روئل بوٹینیکل گارڈن' دکھاؤن لئی ادوں اوہ ہائیوے
'چوں نکل کے اسے سڑک اتوں لنگھیا سی... اپنے برابر تر
پھر رہے کرن، لکھی تے سریندر کور دے سنگ ساتھ اوہ
ڈاڈھا ہی خوش سی۔ بھانت سبھانتے رنگاں روپاں والے پھل
اوہناں دی خوشی 'چ جیویں سگندھیاں بھر رہے ہون۔ سپنجی
گھاہ تے بیٹھ سوادلیاں سینڈوچاں کھاندیاں اجیت سنگھ نے ٹبر
نال اک تازی خوشی سانجھی کیتی سی، ''کل جدوں جیک نے
میرا روڈ ٹیسٹ لیا تاں ویئری گڈ ویئری گڈ کر اٹھیا... ریٹ وی
مان ٹرکنگ کمپنی نالوں ودھ دئیگا۔ اپنے بندے کم بہت زیادہ
لیندے آ پر تنخواہ پکھوں پورے لیچڑ آ... ''
''کیہ ایتھوں دے ٹرک ڈرائیوراں دا وی انڈیا دے ڈرائیوراں
والا حال اے... نشے پتے تے ہور ماڑیاں عادتاں۔'' سریندر نے
پچھیا سی۔
''نہیں۔ ویسے ڈرگاں دا عیب ایتھے وی بتھیرا اے پر ایہہ
کسے اک کتے نال نہیں جڑیا ہویا... عام لوکیں سیانے نے،
شراب پی کے ڈرائیو نہیں کردے۔ قانون وی سخت نے... باقی
ایس جوب 'چ پیسے چنگے آ۔'' اجیت نے دسیا سی۔
لکھی تے کرن مستی جیہی وچ گھلن لگ پئے۔ اوہناں ول
ویکھدیاں سریندر کور اندر موہ امڈ آیا۔ بلھاں تے مسکراہٹ
پھیل گئی۔ بیتے نوں یاد کردی اوہ بولی، ''تہاڈے ایدھر آؤن بعد
لکھی نے تاں خاص نہیں پر کرن نے تہانوں بہت مس کیتا۔ کیہا
کرے چلو ڈیڈی کول چلیئے۔''
گیس سٹیشن دے کلاک اتے ہر سیکنڈ نال بدلدے وقت ول
تکدیاں اجیت سنگھ دی سوچ 'بوٹینیکل گارڈن' توں واپس پرت
آئی۔ ویراگ 'چ اوہ بڑبڑایا، 'کرن! ادوں دے وچھڑے تاں آپاں
مل گئے سی پر ہن... میں تاں سالاں بدھی تیرے راہاں 'چ
کھڑا رہندا پر توں مڑن والے راہیں نہیں گیا... ' اگلے پل
اجیت سنگھ دی نظر ہائی وے ول چلی گئی۔ دوناں پاسیاں نوں
وگدے چار چار لیناں اپر لوکیں، عام وانگ، واہناں دڑائی لجا
رہے سن... کرن ایس دنیاں 'چ سی جاں نہیں، کسے نوں ایس
نال کوئی واسطہ نہیں سی۔
جوان پت دی موت توں بعد اجیت سنگھ اج پہلی وار سفر
تے نکلیا سی۔ انیکاں لوگ بکاں 'چ درج، کروڑاں کلومیٹراں
دے سفر دوران اجیت سنگھ نراشتاواں وچیں وی گزریا سی۔ پر
اوس دی روح کدی وی ایداں نہیں سی بجھی جیویں ہن...
ہؤکا بھردیاں اوس نے ٹرک دا دروازہ کھولیا اتے سٹیرنگ تے
بیٹھ گیا۔ ٹرک نوں ہائیوے تے پاؤندیاں اوس نوں چیتا آ رہیا
سی... جدوں اوس نے جیک دے ٹرک تے ڈرائیوری شروع
کیتی تاں ٹرن لگا جوش 'چ ٹرک نوں چٹکاری جیہی مار کے
کہندا ہوندا سی، ''چل اوئے بیلیا۔''... اوہ ٹرک نوں اندروں
باہروں لشکا کے رکھدا۔ سمیں سر لوڈ چکدا، سمیں سر لاہندا۔
اوس دی لگن ویکھدیاں اک ویراں جیک نے کیہا سی، ''ایجیت!
مینوں تیرے 'چ امیرکن ڈریمکن نظر آؤندے۔ امیرکن ڈریمکن
بارے جاندا ایں نہ؟ یعنی کوئی وی بندہ امیر بن سکدے، بزنس
'چ اپنی دھانک جما سکدے۔... توں دیکھدا ای ایں کنے موقعے
نے ایتھے۔ پر ایتھے سارا کجھ بدلدا وی بڑی تیزی نال اے...
''
''جیک! مینوں خوشی اے کہ میرا تیرے نال تعلق بننائیں۔
میں تیتھوں کجھ سکھ سکانگا۔''
''شاید میں وی تیتھوں کجھ سکھ سکاں۔'' جیک نے آکھیا
سی۔
جیک دے دوویں ٹرک 'برٹن ٹرکنگ کمپنی' نال لگے
ہوئے سن۔ اجیت سنگھ اس کمپنی دے ڈرائیوراں تے ہور
کامیاں نوں ''ہاؤ یو ڈوئنگ؟'' کہہ کے اوہناں دا حال چال پچھدا۔
اپنا دسدا۔ جیہڑے اپنی گوری چمڑی کرکے آکڑ جیہی 'چ
رہندے، اوہناں نوں وی 'مورننگ'، 'ایوننگ' بلا کے پیچویں
بلھاں راہیں مسکرا چھڈدا۔
جیک اجیت دا پورا خیال رکھدا... اجیت ہراں کول ادوں
اک ہی کار سی۔ لوڑ پین تے جیک اس لئی رائیڈ دا بندوبست کر
دیندا۔ ایس طرحاں اوہناں دا اک دوجے دے گھریں وی آؤن جان
شروع ہو گیا۔
''جیک! یو گوٹ اے بیوٹی فل وائف۔ لگدا ہی نہیں کہ اوہ
دو بچیاں دی ماں اے۔'' کیتھی بارے ایہہ شبد اک دن اجیت دے
مونہوں جیویں بدوبدی نکل گئے۔
''سریندر از آل سو بیوٹی فل۔'' جیک نے مسکرا کے کیہا۔
''ریئلی؟'' اجیت نے مذاق جہے 'چ حیرانی پرگٹائی۔
اوہ دوویں ہس پئے سن... اجیت دے من وچ سریندر دا
رنگ روپ گھم گیا سی۔ اوس نوں گلانی جیہی محسوس ہوئی
کہ اوہ سریندر نوں بن ٹھن کے رہن دے موقعے پردان نہیں
سی کر سکیا۔ ہمیشہ کماں ہیٹھ ہی دبی رہی سی اوہ، پہلاں انڈیا
'چ تے ہن ایتھے...
''سریندر! بس تھوڑا چر ہور آ، اپنا ٹرک لے کے تیرا
اوورٹائیم چھڈا دینا آں۔'' امریکہ دے گیڑیاں توں مڑ کے پتنی
نوں باہاں 'چ لیندا ہویا اوہ آکھدا۔
تے جس دن اوس نے ٹرک خریدیا، اوہناں دے گھر دا کونا
کونا کھڑ اٹھیا سی۔
جیک نال صلاح کرکے اجیت نے ٹرک 'برٹن ٹرکنگ
کمپنی' نال ہی لا لیا۔ روٹ ایریئے وچ کنیڈا امریکہ دے اوہ
سارے شہر سن جو گریٹر ٹرانٹو توں دو ہزار میل دے گھیرے
'چ پیندے سن۔ اجیت نے اپنے نال اک ڈرائیور رکھ لیا۔ ہائیویاں
اتے گیت جہے گاؤندا، اوہ گیڑے تے گیڑا بنھی رکھدا۔
کم ریڑھے پے جان تے اوس نے اپنی بینک نال گل کیتی
تے اک ٹرک ہور لے لیا۔ پہلے ڈرائیور نال اک ہور ڈرائیور
رکھ کے اوہناں نوں کنیڈا امریکہ روٹ تے لا دتا تے آپ لوکل
چلاؤن لگ پیا۔ شام نوں اوہ ٹبر 'چ بہندا۔ سریندر ہن اوورٹائیم
نہیں سی کردی۔ ویک اینڈز تے اوہ گھمن پھرن چلے جاندے۔
خوب ہسدے کھیڈدے۔
سیل پھونل دی گھنٹی نے اجیت نوں سوچاں وچوں باہر
کھچ لیا۔ اوس نے کھبے ہتھ نال سٹیرنگ سانبھیا تے سجے نال
فون کن کول لیا کے 'ہیلو' کیہا۔
''ہائے ایجیت! کتھے کو پہنچ گئیں؟'' جیک بول رہیا سی،
مسیساگا قائم اپنے ٹرک دفتر توں۔
''بپھلو توں اگے۔'' اجیت نے دسیا۔
''اس حساب نال توں گیاراں وجے کلیولینڈ پہنچ جائیں گا۔''
''او یاہ، پر توں کویں کال کیتائے؟'' اجیت نے پچھیا۔
''اج شام نوں 'کنگزویء انشورنس کمپنی' والے آپاں نال
ٹرکاں دی انشورینس بارے گل کرنی چاہندے آ۔ اوہناں دے نویں
ریٹ بڑے واجب لگ رہے نے۔'' جیک بولیا۔
''کنے وجے دی اپوائنٹمنٹ اے؟''
''چھ وجے بلا رہے آ آپاں نوں۔''
''ٹھیک اے۔ میں چار وجے تک واپس پہنچ جاواں گا۔ توں
دفتر 'چ ہی رہیں۔ آپاں گھروں کپڑے چینج کرکے، اوہناں ول
چلے چلانگے۔''
فون بند کردیاں اجیت سنگھ دا دھیان ہائیوے دے نال نال آ
رہی اس سڑک ول چلا گیا جو موڑ جیہا مڑدی اچانک ہی الوپ
ہو گئی سی... پر پھیر اوس نوں لگا کہ اوہ سڑک نہیں سی...
اوہ تاں اسدا سرو ورگا پتر کرن سی، ہائیوے توں پرے میپل
دے درختاں ہیٹھ کھلوتا... اجیت سنگھ دے ویوگے ہوئے من 'چ
اک یاد ابھر آئی... کرن گھر دے بیکیارڈ 'چ میپل دا بوٹا گڈ رہیا
سی۔
''پت! میں تاں تینوں انگوراں دیاں ویلاں لاؤن نوں کیہا
سی۔'' کول نوں ہندی سریندر کور نے آکھیا سی۔
''چھڈو ممی، کدھر چھتے بناؤندے پھرانگے۔ مینوں تاں
ویلاں نالوں درخت ودھیا لگدے آ۔ کوئی سپورٹ نہیں منگدے۔
اپنیاں جڑھاں اتے تنے تے کھڑدے آ۔ سٹرونگ تنے والا ایہہ
میپل دا درخت نالے دیکھن نوں سوہنا تے نالے کنیڈا دا نیشنل
ٹری۔''
''پر پھلدار بوٹے دی اپنی امپورٹینس ہندی اے۔'' اجیت
سنگھ نے پتنی دی گل دی ہامی بھری سی۔
''ڈیڈی! فروٹ دا کیہ آ، سٹوراں 'چوں جنا مرضی خرید
لئو۔ پر چھاں تاں نہیں نہ خریدی جا سکدی۔ ایہہ تاں سانوں
اپنے ہی بوٹے توں ملنی آں۔'' پانی والی پائیپ چکدیاں کرن نے
کیہا سی۔
'کرن! تیتھوں بناں تیرے میپل دی چھاں نوں اسیں کیہ
کریئے؟' بڑبڑاؤندے ہوئے اجیت سنگھ دیاں اکھاں سلھیاں ہو
گئیاں۔ جھورے 'چ ڈبا اوہ پتہ نہیں کنا چر ٹرک دے گیجاں دیاں
سوئیاں نال ونھ ہوندا رہیا۔
... تے پھیر ہائی وے 'چ آ ملی اک سڑک نوں تکدیاں اوس
دے کناں چ جیک دے ایہہ بول گونج گئے، ''ایجیت! جس
طرحاں انجانیاں سڑکاں دور دراڈے کونیاں توں شروع ہو کے
اک دوجی نوں جا ملدیاں نے، اسے طرحاں بندیاں دے وی میل
ہو جاندے نے۔''... جیک سنبندھی شروع شروع 'چ تاں اجیت
نے اینا ہی محسوس کیتا سی کہ اوہناں نوں اک دوجے نال
مطلب سی۔ جیک نوں اک بھروسے یوگ ڈرائیور مل گیا سی
تے اجیت نوں اوس دی محنت دا صحیح مل پاؤن والا ٹرک
مالک۔... تے پھیر اوہناں دے وہار وچلی صفائی اوہناں نوں اک
دوجے دے وشواس 'چ بنھدی چلی گئی۔ اک دوجے دے کم آؤنا،
اک دوجے دے سنگ ٹرنا، اوہناں نوں چنگا لگن لگا... ادوں
وی تاں اوہ اک دوجے دے سنگ ہو ٹرے سن، جدوں 'برٹن
ٹرکنگ کمپنی' نے ٹرک اوپریٹراں دے مائیلیج ریٹلیج گھٹا دتے
سن... ساتھی اوپریٹراں نال وچار وٹاندرا کرن مگروں جیک
تے اجیت نے موہرے ہو کے کمپنی دے مالک، مسٹر برٹن نال
آڈھا لا لیا کہ اوپریٹراں نوں پچھے بغیر اوس نے مائیلیج ریٹلیج
کویں گھٹا دتے سن... مسٹر برٹن نے زیادہ ٹرکاں والے
اوپریٹراں اگے معمولی جہے بونس دا چوغا سٹ دتا۔ بندے
کرنے شروع ہو گئے... مسٹر برٹن نے اپنی گل پگا لئی۔
اجیت تے جیک دے کنیڈا امریکہ دے دراڈے شہریں
جاندے ٹرکاں نوں سمیں سر لوڈ ملنوں ہٹ گیا۔ کوئی ہور راہ
تیار کرن لئی اوہ آپو اپنیاں ویونتاں نال آسے پاسے دے زاویئے
ناپن لگے... ٹرکنگ انڈسٹری وچ جس طرحاں اجیت سنگھ دا
کجھ پنجابی ٹرکاں والیاں نال واہوا میل جول سی، اویں ہی
جیک ہیریسن دا وی کجھ گورے ٹرکاں والیاں نال چنگا اٹھن
بیٹھن سی۔ اوہ دوویں دوجیاں کمپنیاں ول وی ویکھ رہے سن
تے اک دوجے ول وی۔... جیک نے پہل کیتی۔ کُھل کے گلاں
ہوئیاں... دوویں سانجھ نبھاؤن، سنگھرش کرن تے نویاں
چنوتیاں ساہمنے کھلون لئی درڑھ سن۔ ہریک پکھ نوں باریکی
نال وچار کے اوہناں اپنے تن تن ٹرکاں نال سانجھی 'ہندل اینڈ
ہیریسن ٹرکنگ کمپنی' کھول لئی۔ تے مسٹر برٹن نوں کھریاں
کھریاں سنا کے 'دا ہیل ود یوئر کمپنی' کہہ دتا۔
اپنی کمپنی بابت، اوہناں نے لکھتی طور تے نیم بنھ لئے
کہ اوہ آپو اپنے ٹرکاں دے خرچے دے ذمہ وار تے آمدن دے
حقدار ہونگے۔ سانجھے خرچے ٹرکاں دی کمائی دے انوپات
مطابق ونڈے جانے سن۔
ٹرکاں دی ڈسپیچ تے مینٹننس دا کم اجیت دے زمیں سی
تے روٹاں اتلے پرمکھ وپارک اداریاں اتے لوڈ بروکراں کولوں
بزنس حاصل کرن دا کم جیک دے زمیں۔
جیک دا کم زیادہ تر بیگانے وسانے والا سی۔ اس ولوں
اپوائنٹمنٹ منگن تے بروکرز اتے وپارک اداریاں دے سنبندھت
ادھیکاری جیک دی نہیں، اپنی سودھا انوسار سماں دیندے۔ پینڈا
نیڑے دا ہوندا جاں دور دا، جیک اوہناں کول سمیں سر پہنچدا۔
مسکرا کے ہائ ہیلو کہندا۔ مٹھاس نال گل شروع کردا۔ موہریوں
کئی تاں اپنے نال جڑیاں وڈیاں وڈیاں ٹرکنگ کمپنیاں وچیں
جیک ہراں دی چھوٹی جیہی کمپنی نوں تولدے ہوئے نانہہ دا
اشارہ دے دیندے۔ پر کجھ، جیک ولوں اؤپھر کیتے جاندے
گھٹ ریٹ دیکھدیاں وستھار 'چ گل کرن لئی تیار ہو جاندے،
اوہناں وچوں وی کجھ بھار جیہا پھڑن لگ پیندے۔ اوہناں نوں
جیک لنچ جاں ڈنر لئی چنگے چنگے ریسٹورینٹاں 'چ لے کے
جاندا تے جاں پھیر اوہناں لئی قیمتی تحفیاں دا بندوبست کردا۔...
مساں ہی جا کے کوئی کانٹریکٹ سرے چڑھدا۔
اس چیڑھے جہے کم 'چ جیک اجیہا بزی ہویا کہ اس سال
اوہ ہولیڈیئز تے وی نہ جا سکے۔ دراصل جیک جانا ہی نہیں
سی چاہندا۔ اسدا رخ ڈھنگ دیکھ کے کیتھی تے دونوں نیانے
کٹی تے ڈیو، اس تے خفا ہو گئے۔ ''جیک! ایہہ کیہ ہو رہے؟
پہلاں توں ساڈے کئی ویک اینڈز برباد کیتے تے ہن ہولی ڈیئز
تے جان دا پروگرام وی 'میسڈ اپ' کری جا رہیں۔'' کیتھی نے
غصہ جھاڑیا سی۔
''دیکھ کیتھی! ایس سمیں آپاں نوں ودھ توں ودھ ڈالراں دی
لوڑ اے۔ سو خرچے گھٹاؤ... ایجیت ہراں ول دیکھو، اوہ سوچ
سمجھ کے خرچے کردے آ۔ ایجیت کہہ رہیا سی کہ اوہ باقاعدہ
طور تے ہولی ڈیئز تے جانا ادوں ہی شروع کرن گے، جدو
بزنس 'چ پوری طرحاں قائم ہو گئے۔''
کیتھی تے نیانیاں نوں جیک دیاں گلاں بڑیاں ہی
بےتھوھیاں جہیاں لگیاں۔ اوہناں نوں تاں ہولی ڈیئز توں بناں
زندگی ہی بے سری لگ رہی سی۔ بے تاب ہوئے اوہ میلیاں
گیلیاں دے تیوہار کرسمس نوں اڈیکن لگے۔
کرسمس آئی۔ جیک نویں پرانے کلائنٹاں نوں سبھ اچھاواں
آکھن اتے تحفے بھیٹ کرن 'چ رجھ گیا۔ اس لئی، محنت نال
حاصل کیتے کانٹریکٹاں نوں ستھائی بناؤنا اتی ضروری سی۔
کھجھ 'چ آئی کیتھی نیانیاں نوں لے کے ہولیڈیئز کرن لئی
فلورڈا چلی گئی۔
اوتھے اک دن اوہ بیچ تے سن کہ چوداں سالاں دی الھڑ
کٹی اچانک ہی گم ہو گئی۔ پھن بھالدی بھالدی اوہ اک غنڈے
دے چنگل 'چ پھس گئی سی۔ پولیس دے ترنت ایکشن نے اوس
نوں بچا لیا۔ پر پولیس ولوں کٹی دی بھال دے گھنٹیاں دوران
کیتھی دا برا حال ہو گیا سی۔ کنے ہی ماڑے خیال اوس دی
سوچ وچ گھمے سن... کٹی دا ریپ... کٹی دا قتل... کٹی دی
بے پچھان لاش۔... دہشت نال سن ہوئی دھی نوں گلے لاؤندیاں
اس کمبدی آواز 'چ آکھیا سی، ''ہنی! تھینک گوڈ، توں صحیح
سلامت ایں۔ جے تینوں کجھ ہو جاندا تاں میں جیک نوں کیہ
مونہہ دکھاؤندی... ساری عمر میں گناہ دے احساس توں مکت
نہی سی ہو سکنا... ''
اگلے سال کیتھی نے ہولیڈیئز تے جان دا ناں وی نہ لیا۔
اجیت نے پچھیا تاں کہن لگی، ''ہولیڈیئز نالوں بزنس 'چ ستھاپت
ہونا ضروری اے... تیری تے جیک دی محنت نوں پھل لگ
رہیا اے۔ ٹرکاں دی گنتی ودھ رہی اے... آپاں سٹرونگ ہو رہے
آں... سریندر دس رہی سی کہ اوس نے جوب چھڈ دتی اے۔
میں وی چھڈ دینی آں۔ میں تے جیک نے صلاح کیتی اے...
کٹی تے ڈیو دونوں اپنی ٹین ایزن چ نیں۔ ساڈا اوہناں وچ بہنا
بڑا ضروری اے۔ پر دوڑ بھج اینی آں کہ سماں ہی نہیں ملدا۔''
تے کجھ مہینیاں بعد کیتھی نے جوب چھڈ دتی سی۔ اوہ
ودھ توں ودھ سماں نیانیاں نال بتاؤندی۔
جدوں کدی اوہ زیادہ ہی ویلھی ہوندی تاں لکھی نال ٹرکاں
دا دفتری کم کرواؤن چلی جاندی۔ لکھی ایس کم 'چ اجے نواں
سی۔ اجیت سنگھ تے سریندر کور لکھی نوں پڑھاؤنا چاہندے
سن۔ پر لکھی دی دلچسپی پڑھائی 'چ نہیں، گھمن پھرن تے
تپھریہاں مارن 'چ سی۔ یونیورسٹی 'چ اوہ تن وار مضمون بدل
چکا سی... اجیت نے جیک نال صلاح کیتی۔ پت نوں ٹبر 'چ
بٹھا کے سمجھایا تے ٹرکاں دا پیپر ورکر کرن لئی راضی کر
لیا۔ پر لکھی دو کو سالاں 'چ ہی ایس کم توں اک گیا تے
ڈرائیوری چ پے گیا۔
کرن دی دلچسپی وی آٹوموبیل 'چ سی... اک ویراں
ریسٹورینٹ وچ لنچ کر رہے دوناں پریواراں 'چ بیٹھیاں اس نے
کیہا سی، ''جیک انکل! ڈیڈی! تسیں دیکھوگے، اک دن اپنی
کمپنی دے ٹرک سڑکاں تے چھا جان گے۔''
تے جدوں کرن نے آٹومبیل انجنیئرنگ 'چ داخلہ لیا تاں
اجیت سنگھ نوں لگا کہ اسدا، نامور ٹرکر بنن دا، سپنا ہن بہتا
دور نہیں سی۔ اوس نوں سڑکاں وی ایس گل دی شاہدی بھردیاں
لگدیاں۔ ہر سڑک جیویں کہہ رہی ہووے، 'توں ہمت کر اسیں
تیرے نال ہاں۔' پر ایس سمیں ہائیوے دے ایکسپریس لینپریس 'چ
ٹرک بھجائی لجاندیاں اجیت سنگھ محسوس کر رہیا سی کہ ایہہ
ایویں اسدا بھلیکھا سی۔ سڑکاں دا کسے نال کوئی ہت نہیں ہندا۔
ایہناں دا اپنا مقصد ہوندا اے۔ ایہہ لوکاں نوں دڑائی رکھنا
چاہندیاں نے... اک دوجے توں موہرے نکل جان نوں ہی
زندگی دا منورتھ بنا دیندیاں نے... اجیت تے جیک کجھ ہی
سالاں 'چ چھوٹیاں چھوٹیاں کئی ٹرکنگ کمپنیاں توں موہرے
نکل گئے سن۔ سڑکاں وی جیویں اوہناں نوں سلاماں کرن لگ
پئیاں ہون...۔ جیہڑے ٹرکرز کدی اوہناں دی دوستی دا پٹاکا پین
دیاں خبراں اڈیکیا کردے سن، اوہی ہن ایہہ کہندے سنے جان
لگے، ''بئی! ایہہ تاں اک دوجے لئی باہلا ای فٹ بیٹھے آ...
دھوڑاں ای پٹی جاندے آ۔''
پنجابی ٹرکرز جدوں وی کسے پارٹی جاں میٹنگ 'چ
اکٹھے ہندے تاں 'ہندل اینڈ ہیریسن کمپنی' دی گل ضرور
چھڑدی۔ جے اجیت سنگھ غیر حاضر ہوندا تاں بول ایرکھامئی
ہندے تے جے اوہ حاضر ہوندا تاں پرشنسامئی، ''بلے ہندل
صاحب! ہور کجھ سالاں تائیں تسیں ساڈی کمیونٹی دے نمبر
ونبر ٹرکر ہوووگے۔''
اجیہے شبد اجیت سنگھ نوں نشہ جیہا چڑھا جاندے۔ لوکاں
'چ بہنا اٹھنا، اوہناں سنگ کھانا پینا اوس نوں چنگا لگدا۔ اپنی
کمیونٹی ولوں ملدے آدر مان نال اوس نوں خوشی ہندی... تے
پھیر اوس دی خوشی نوں اک نواں ہی پاسار مل گیا۔ جیک تے
کجھ پنجابی ٹرکراں دے یتناں صدقہ، اوس نوں 'مسیساگا ٹرکرز
ایسوسی ایشن' دا میت پردھان چن لیا گیا۔
اوہناں ہی دناں وچ اجیت سنگھ دے اک واقف ٹرکر راہیں
لکھی دے رشتے دی گل چل پئی۔ کڑی منڈے نے اک دوجے
نوں دیکھیا، گلاں باتاں کیتیاں تے 'ہاں' کر دتی۔ ماپے تاں پہلاں
ہی سہمت سن... کڑی والے اجیت سنگھ ہراں دے ودھ رہے
بزنس توں پربھاوت سن تے اجیت سنگھ ہریں کڑی دی شکل
صورت اتے اوس دی چنگے پیسیاں والی سرکاری جوب توں۔
پک ٹھک ہو گیا۔ ویاہ دے دن بنھ دتے گئے۔
جیک تے کیتھی نے مائیوں والے دن توں لے کے پارٹی
دی رات تک بھرویں حاضری لوائی سی تے کجھ رسماں بارے
سوال وی پچھے سن۔ انند کارج دی سماپتی مگروں اوہناں نے
اجیت سنگھ کولوں گرودوارہ ہالدوارا دیاں دیواراں تے لکھیاں
گربانی دیاں تکاں بارے جانن دی اچھا پرگٹائی سی۔ اجیت
سنگھ نے جدوں 'جن پریم کیؤ تن ہی پربھ پائیو' دا انگریزی
انوواد کیتا تاں اوہ بولے، ''ایہہ گل عیسائی مت 'چ وی ہیگی
اے لو از گوڈ۔''
'ونڈ چھکو' دا انوواد سن کے اوہناں آکھیا سی، ''ساڈیاں
پھوڈ بینکاں دا مقصد وی ایہی اے۔''
وچار وٹاندرا کردیاں اوہناں نوں سکھ دھرم 'چ سیوا تے
عیسائی دھرم 'چ چیرٹی دے سدھانتاں وچ وی سمیلتا نظر آئی
سی۔
تے پھیر گل چل پئی سی اجوکے نگھاراں دی...
گرجاگھراں تے گوردواریاں دے دھر اندر تک پہنچ چکیاں
منڈی دیاں سڑکاں دی... راجنیتی دیاں سڑکاں دی...
رات نوں پارٹی ہالٹی 'چ کرن تے لکھی نے جیک، کیتھی،
کٹی تے ڈیو نوں وی ڈانس وچ کھچ لیا سی۔ میوزک دا اچا
وولیوم جیک ہراں نوں ہور طرحاں دا لگا سی۔ پر اوہ خوش
سن۔ سارے ہی خوش سن۔ ہر چہرہ مسکرا رہیا سی، ہس رہیا
سی۔
'کتھے گواچ گئے اوہ مسکراہٹاں تے ہاسے؟' اجیت سنگھ
نے اپنے آپ توں پچھیا سی... جاں شاید سڑکاں کولوں...
کلیولینڈ دے ٹرک سٹوپ 'چ پہنچ کے اوس نے ٹرک کھڑا کر
دتا۔ اڈیک رہے بِندر نے اگانہہ ہو کے 'ست سری اکال' بلائی۔
'ست سری اکال' کہندیاں اجیت سنگھ نے بِندر دی پٹھ تھاپڑی۔
کجھ دیر اوہ خراب ہوئے ٹرک بارے گلاں کردے رہے... تے
پھیر اجیت سنگھ نے پچھیا، ''بندر! لنچ ایتھے ہی کر لئیے جاں
راہ 'چ کرنی؟''
''انکل! راہ 'چ رکن نالوں تاں ایتھے ہی کر لینا ٹھیک اے۔''
بِندر نے صلاح دتی۔
تے اوہ ٹرک سٹوپ وچلے ریسٹرینٹ 'چ جا وڑے۔ اجیت
سنگھ نوں پل دی پل انج لگا جیویں ٹیبل تے اوس دے ساہمنے
بِندر نہیں کرن بیٹھا ہووے۔ ایہہ بھچکا پہلاں وی کجھ اک
موقعیاں تے اوس نوں لگا سی... بِندر دا قد کاٹھ تے ٹھرھمے
والا سبھاء کرن نال میل کھاندے سن۔ انج وی بِندر دی، کرن
تے لکھی دوناں نال چنگی بندی سی۔ کدی کدی جدوں اوہ تنے
جنے کتے جان لئی تیار ہو رہے ہوندے تاں اجیت سنگھ مخول
'چ آکھدا، ''بئی! بڑے پرپھیوم مہک رہے آ۔ کدھر وہیراں گھتیاں
نے؟''
''ڈیڈی! میکڈونل جاں کسے چائینیز ریسٹورینٹ 'چ جا
بیٹھاں گے جاں کوئی نویں فلم دیکھ آواں گے۔ ہور کتھے جانیں
اسیں۔'' مسکراؤندا ہویا کرن آکھدا۔
'پترا! تیری ممی تاں اجے وی کدی کدی کہہ دیندی اے
میرا کرن اپنے دوستاں نال گھمن پھرن گیا ہویائے۔ لیٹ رات
تک مڑ آئیگا۔ میں اوس نوں آکھدا ہاں بھلیے لوکے! اپنی ایہہ
رات بہت لمبی اے، عمراں جیڈی لمبی... کدوں تک اڈیکدی
رہینگی کرن نوں! پر اوہ کملی مندی ہی نہیں۔ تیرے غم 'چ
جدوں اوہ پرل پرل ہنجو وحہ رہی ہندی اے تاں میتھوں دیکھی
نہیں جاندی۔ مینوں ڈر اے کہ اوہ رو رو کے کتے انی ہی نہ ہو
جائے... ' روح نپیڑویں ایہناں احساساں نوں اندر ہی اندر
پیندیاں اجیت سنگھ نے مونہہ پرے کرکے اپنے ہنجو لکو لئے۔
کھا پی کے اوہناں ٹریلر ہک اپ کیتی تے ٹر پئے۔
سٹیرنگ تے بِندر سی۔ نال بیٹھا اجیت سنگھ، کلیولینڈ نوں
چھوہندی اری جھیل دیاں چھلاں 'چ گاچیا پتہ نہیں کدھر کدھر
بھٹکدا رہیا...
اوہ امریکہ کنیڈاا بارڈر لنگھ آئے۔ بِندر نے ٹرک 'چ چلدا
ریڈیو بند کرکے سٹیریؤ اؤن کر دتا... اک گیت دے ایہہ بول،
'لمبی لمبی امریا چھوڑو، پیار کیہ ایک گھڑی ہے بڑی... '
سن کے اجیت سنگھ اندروں لما ہؤکا نکل گیا...
اودھر گیت دے بول سندیاں بِندر دیاں اکھاں موہرے وی
اچیت ہی کرن گھم گیا سی... سٹیریؤ بند کرکے، اداس ہویا، اوہ
سوچیں پے گیا... تے پھیر بوجھل ہندی جا رہی چپ نوں
توڑدیاں بولیا، ''انکل! پرسوں لکھی ملیا سی... کہہ رہیا سی کہ
اوس نوں تہاڈا تے آنٹی دا فکر رہندا اے۔''
اجیت سنگھ ''ہوں'' کہہ کے چپ ہو گیا۔
بِندر نے، ایہہ سوچ کے کہ انکل گل کرن دے موڈ 'چ نہیں
سی، گل ایتھے ہی چھڈ دتی۔
پر اجیت سنگھ اندر گل تر رہی سی۔... ہائیوے 'چوں پاٹدی
اک سڑک ول دیکھدیاں اوس نوں یاد آ رہیا سی... لکھی تے
مینوں ہنیمون مناؤن لئی فلورڈا گئے سن۔ سارے پریوار نے
خوش ہو کے اوہناں نوں وداع کیتا سی۔ پر جدوں اوہناں سال
دے وچ وچ ہی پھیر ہولیڈیئز تے جان دا موڈ بنا لیا تاں اجیت
سنگھ نوں غصہ چڑھ گیا، ''لکھی! اینی انی کمائی ہے نی کہ
ہریک سال کدی پھلورڈا، کدی کیوبا تے کدی کتے ہور،
ہولیڈیئز کرن ترے رہو۔ ڈہ کے کم کرو۔ میں سگوں تیرے نال
مینوں بارے وی گل کرنی سی۔ اوہ خرچ ہی بڑا کردی اے۔
جے ساری تنخواہ نویاں نویاں ڈریساں اتے کینیڈین کھانیاں تے
ہی خرچ کری جانی آں تاں جوب کرن دا کیہ فائدہ؟''
لکھی نے تاں ''ٹھیک اے ڈیڈی۔'' کہہ کے سن لیا۔ پر مینوں
نے مونہہ وٹ لیا۔
اجیت سنگھ دا غصہ ودھن لگا۔
''ٹکراء نہ کھڑا کرو۔ سمجھاؤنا چاہیدے۔'' سریندر کور نے
کیہا سی۔
تے نونہہ پت نوں سمجھاؤندیاں اوہناں کیہا سی، ''... چلو
ہن تہاڈا موڈ بنیاں آں، جا آؤ۔ پر اگانہہ خیال رکھیو۔''
پرنتو مینوں دیاں فالتو خرچ کرن دیاں عادتاں 'چ کوئی
فرق نہ پیا۔ اجیت سنگھ تے سریندر کور ٹوک ٹکائی کرن لگ
پئے۔ مینوں شروع شروع 'چ تاں چپ کرکے سندی رہی پر اک
دن موہرے بول پئی، ''تہاڈا لائیپھ سٹائیل اپنا اے تے میرا اپنا۔''
''مینوں! توں شاید بے حسابے خرچ نوں ہی لائف سٹائیل
سمجھ رہی ایں۔ لائف سٹائیل 'چ تاں بڑا کجھ ہوندا اے... ایس
وچ بندے دے اپنے تے پریوار دے گول وی ہندے نے، جیہناں
نوں اچیو کرنا ہندے۔'' اجیت سنگھ نے کیہا۔
''میں تہاڈے گولاں نال ایگری نہیں کردی۔ زندگی دی
کئیلٹی وی کوئی چیز ہندی اے... فار یو دا لائف از ایٹ، سلیپ
اینڈ گو ٹو ورک۔ بٹ فار می دیئر از مور ٹو لائف۔''
کرن نوں مینوں دے بولاں وچلا کھرھواپن چنگا نہ لگا۔
اوہ بولیا، ''بھابی جی! آپاں نوں پولائیٹلی گل کرنی چاہیدی آ...
دیکھو! ممی ڈیڈی نے بڑی سٹرگل کرکے کمپنی کھڑی کیتی
اے۔ ہن جے ایہہ آپاں نوں بجٹ نال چلن تے ہور گروء کرن
لئی کہہ رہے آ تاں وھٹ'س بیڈ ان اٹ؟''
''کرن ٹھیک کہہ رہے''، کرن دے بولاں توں اتشاہت ہو
کے اجیت سنگھ بولیا، ''آپاں کاروبار نوں تاں ہی ودھا سکدے
آں جے حساب نال چلیئے... جیک ہریں خرچے کنٹرول کیتے
ای آ۔ پہلاں اوہ ہریک سال ہولیڈیئز تے جاندے ہندے سی۔ ہن تن
سالاں بعد جاندے آ۔... میں پہلاں وی اک دن گل کیتی سی کہ
اپنے ٹرکاں دیاں قسطاں اوورڈیو ہوئیاں پئیاں نے، جس کرکے
ویاج بہت زیادہ دینا پے رہے... بئی مینوں! توں تکڑی تنخواہ
لیندی ایں، کجھ مدد کر۔''
''مینوں دیاں تاں سٹوراں دے کریڈٹ کارڈاں دیاں پیمینٹاں
ہی نہیں مکدیاں۔'' سریندر کور بولی۔
مینوں دے طیور چڑھ گئے۔ سس سوہرےنوں کھجھیاں
نظراں نال تکدیاں اوہ بولی، ''میرا تہاڈے ٹرکاں دیاں قسطاں
نال کوئی واسطہ نہیں۔ تسیں ٹرک ویچ کے لون موڑ دیؤ۔''
''جے تہاڈی ایہی سوچ رہی تاں گھر دا بھٹھا ضرور
بٹھاؤگے۔'' لال پیلا ہویا اجیت سنگھ بولیا۔
''ڈیڈی! تہانوں اپنی سوچ ہی ٹھیک لگدی آ۔ دوجے نوں
تسیں لسن ہی نہیں کردے۔ پچھلے سال میں تہانوں روکیا سی
کہ ہور ٹرک اجے نہ پاؤ، پہلاں پچھلا لون لاگے کر دیندے آں۔
پر تسیں اپنی مرضی کیتی، نواں ٹرک ہور پا لیا۔'' مینوں دے
نال سوفے تے بیٹھے لکھی نے تلخ ہو کے آکھیا۔
''لکھی! یو آر رائیٹ۔ ڈیڈی نوں تیری گل مننی چاہیدی سی۔
پر جیہڑی گل ممی ڈیڈی کہہ رہے آ، بھابی دے 'ٹو مچ' خرچہ
کرن دی، اوس نوں تسیں وی لسن نہیں کر رہے۔''
کرن دی گل سن کے لکھی کرودھ 'چ مچ اٹھیا۔ مینوں دا
تاں پارا ہی چڑھ گیا۔ اوہ بھبک پئی، ''اٹ'س ہوربل۔ کیہو جیہی
پھیملی ہے ایہہ! میرا تاں ایس گھر 'چ دم گھٹدا جا رہیا اے۔''
... مینوں وانگ لکھی وی گھردیاں نال وٹیا وٹیا رہن لگ
پیا۔ اجیت سنگھ تے سریندر کور نے اوس نوں سمجھاؤن دی
کوشش کیتی۔ پر کوئی فرق نہ پیا۔ اوہناں جیک نوں آکھیا۔
جیک ولوں گل کرن تے لکھی نے کیہا سی، ''انکل! مینوں
تے میرے پیئرنٹس دے وچاراں 'چ اینا زیادہ فرق اے کہ ایہناں
دی کدی وی سر نہیں رل سکدی۔ ساڈے لئی الگ ہو جانا ہی
بہتر اے۔... مینوں پیرنٹس نالوں اپنی وائف زیادہ امپورٹینٹ
اے۔''
''لیکھی! آئی ایگری ود یو، یوئر وائف از مور امپورٹینٹ
ٹو یو۔ پر کیہ ایداں نہیں ہو سکدا کہ رہو تسیں الگ تے کم 'کٹھا
کرو؟''
''نہیں انکل! ہن ساڈی ایداں وی نہیں نبھنی... بعد 'چ ایویں
کوئی ہور جھگڑا کھڑا ہو جاؤ۔''
''او.کے.، جیویں تیری مرضی۔... جیکر کدی میری لوڑ
پئی تاں ضرور دسیں۔'' جیک نے آپنیپن دے رؤں 'چ آکھیا سی۔
لکھی نال ہوئی گل بات اجیت سنگھ نوں دسن مگروں
جیک نے کیہا سی، ''ایجیت! ڈونٹ کریئیٹ اینی پھس... بزنس
'چوں لیکھی دا بندا حصہ اوس نوں دے دے۔''
پر اجیت سنگھ دے ٹرکر دوست گرنام وڑیچ نے اپنا وچار
انج دتا سی، ''اجیت! توں اڑ جا... جے میں تیری جگہ ہوواں
تاں کجھ وی نہ دیاں ایہو جہے اڑیئل نونہہ پت نوں۔''
اجیت سنگھ نے پتنی نال صلاح کیتی۔ سریندر کور نے
آکھیا سی، ''... لوکاں نے تاں تماشہ دیکھنا ہوندا اے... جیک
دی گل ٹھیک اے... آپاں نونہہ پت نال کوئی وگاڑ بکھیڑا نہیں
پاؤنا۔''
... تے اجیت سنگھ نے ٹرکاں تے کھڑے بینک قرضے
نوں حساب 'چ لیندیاں تن ٹرک، نویاں ورگے، لکھی نوں دے
دتے۔ حساب کتاب کردیاں اوس دے من 'چ اوہ سماں وی
گھمیاں سی جدوں بھرا رتن سنگھ نے اوس نوں کجھ وی نہیں
سی دتا۔
لکھی تے مینوں اک کرائے دے گھر 'چ موو ہو گئے۔
کجھ ہفتیاں بعد اجیت سنگھ نے دو ٹرک ویچ کے اوورڈیو
قرضے دے کمپیوٹری کھاتیوٹری پدھرے کر دتے۔
جیک نے دو ہور پا لئے۔ اوس دے ویہہ ہو گئے تے اجیت
دے رہ گئے صرف تیراں۔
اجیت سنگھ اپنے آپ نوں ساواں رکھن دی بڑی کوشش
کردا پر نراشتا من 'چ ملوزوری آن وڑدی۔ اوہ کدی نونہہ پت
نوں کوسن لگ پیندا تے کدی جیک دے ٹرکاں ول ایرکھا جیہی
نال تکن لگدا۔ جیک بتھیرا کہندا، ''ایجیت! توں اینی چنتا نہ
کر... سبھ ٹھیک ہو جائے گا۔'' پر اجیت سنگھ اندرلی نراشتا
ہور سنگھنی ہندی جا رہی سی۔ اوس نوں انج لگدا جیویں اس
والے ٹرکاں ٹریلراں اپر 'ہندل اینڈ ہیریسن' دی پٹھ بھومی وچ
چتریا ہویا، لہہ لہہ کردا میپل دا پتہ، پتجھڑی رنگ 'چ تبدیل ہو
گیا ہووے۔... اوس دے دل نوں ہول جہے پین لگ پئے۔ کتھے
تاں اوہ کنیڈا دا نامور ٹرکر بنن دے سپنے لے رہیا سی تے
کتھے ہن اوس نوں، خار کھان والے بندیاں دیاں، ''بہہ گیا
بھٹھا، وڈے ٹرکر دا،'' ورگیاں گلاں سننیاں پے رہیاں سن۔...
غم دا اثر اوس دی صحت تے پین لگا... چنتت ہوئے کرن تے
سریندر کور نے صلاح کیتی... تے کرن نے پڑھائی توں اک
سال دی چھٹی لے لئی۔
کرن دی نویں سپرٹ تے نویں پہنچ دیکھدیاں اجیت سنگھ
ٹھیک ہون لگ پیا۔
کرن گھنٹیاں بدھیاں کمپیوٹر تے بیٹھا رہندا۔ سارے ٹرک
ٹریلراں دی جنرل حالت، اوہناں دیاں سمیں سمیں ہون والیاں
سروساں تے روزانہ کارگزاریاں بارے ویروے اوس نے
کمپیوٹر 'چ پا دتے۔... ٹرکاں دے لوڈ سنبندھی ہن ساری سوچنا
انٹرنیٹ تے آؤن لگ پئی سی۔ دور نیڑے گئے ٹرک ڈرائیوراں
کول جیکر کانٹریکٹ لوڈٹریکٹ گھٹ ہوندا جاں دیری دا کوئی
چکر پے جاندا تاں کرن اوہناں لئی اوپن مارکٹ وچوں لوڈ لبھ
لیندا۔
کمپنی دی کارگزاری 'چ دنو دن فرق پین لگ پیا۔ اجیت
سنگھ نے اک ٹرک ہور ودھا لیا۔
کرن تے جیک نویاں نویاں سکیماں سوچدے۔ اوہناں ہی
دناں 'چ امریکہ دے 'ڈولر اینڈ ڈولر' ناں دے سٹوراں دی چین
نوں کنیڈا 'چ وی اپنے سٹور کھولن دی اجازت مل گئی۔ امریکہ
دے ویئرہاؤساں توں کنیڈا سامان ڈھون دے ٹینڈر نکلے...
ٹرانٹو تے آس پاس دے سٹوراں دا کانٹریکٹ 'ہندل اینڈ ہیریسن'
نوں مل گیا۔ کمپنی لئی ایہہ مان وڈیائی والی گل سی۔
کانٹریکٹ دیاں شرطاں انوسار، ڈھوء ڈھوائی دا کم،
کرسمس توں تن ہفتے پہلاں مکنا چاہیدا سی۔ سٹور مالکاں دی
نگاہ کرسمس دے دناں 'چ ہون والی گپھیدار کمائی تے لگی
ہوئی سی۔ جیک تے اجیت لئی وی ایہہ کانٹریکٹ چوکھے
منافعے والا سی۔... تے ایس سمیں ہائیوے تے مسیساگا نوں
دوڑے جا رہے ٹرک 'چ بیٹھے اجیت سنگھ نوں یاد آ رہیا
سی... انہیں دنیں اوس دے من 'چ ایہہ خیال، گیند وانگ وار
وار ابھریا سی کہ جیکر 'ڈولر اینڈ ڈولر' دا سارا کانٹریکٹ کتے
اسدا اکلے دا ہوندا تاں دھن دھن ہو جانی سی۔
تے پھیر اک دن اوہ، کجھ ایس طرحاں دی ہی گل، جیک
دے مونہوں سن رہیا سی، ''ایجیت! میں سوچ رہاں کہ... تینوں
اک وکھرا کانٹریکٹ لے دیواں...۔'' پر اپنے متر دیاں تکھیاں
نظراں نوں بھانپدیاں جیک نے اکدم ہی گل بدل دتی سی،
''فورگیٹ اباؤٹ اٹ، پہلاں آپاں ایہ والا کانٹریکٹ سرے چاڑھ
لئیے... پھیر دیکھاں گے۔''
کانٹریکٹ نوں سمیں سر نیپرے چاڑھن لئی اجیت، جیک،
کرن تے 'ہندل اینڈ ہیریسن کمپنی' دے سارے ملازم پباں بھار
ہوئے پئے سن۔ ڈرائیور تے دپھتری سٹاپھی، اپنی کمپنی دے
مالکاں جیک ہیریسن تے اجیت ہندل دی ڈالر کٹ برتی نوں
ننددے ہوئے تھکن ٹٹن دیاں شکایتاں وی کری جاندے تے
اوورٹائم اتے بونس دے لالچ 'چ دہاڑیاں وی نہ چھڈدے۔ پر
جدوں انیندرے کارن کجھ ڈرائیوراں دی بے بسی ہون لگی تاں
اوہناں نوں ریسٹ دین لئی اجیت، جیک تے کرن وی ٹرکاں تے
جان لگے۔
اس دن ٹیکساز دے ویئرہاؤس وچوں تن ٹرک اکٹھے ہی
چلے۔ اگلی سویر جد ڈیٹروئٹ توں بارڈر پار کرکے کنیڈا 'چ
داخل ہوئے تاں تھوڑی تھوڑی فریزنگ رینزنگ شروع ہو
گئی۔ لنڈن پہنچے تاں ودھن لگی۔ ماحول وی دھندلمئی ہو گیا۔
اوہناں ہولی ہولی سفر چالو رکھن دا فیصلہ کیتا۔ موسم دا تاں
آؤن والے دناں وچ ایہی حال رہنا سی۔ متھی ہوئی تاریخ تک کم
مکاؤنا ضروری سی۔ نالے باقی ٹریفک وی تاں چل ہی رہیا
سی۔
کیمبرج لاگے کرن نوں، اپنے پچھے آ رہے جیک دے
ٹرک دا بہت ہی زوردار تے بھیانک کھڑاک سنائی دتا۔ سائیڈ
مرر وچیں اوس نے ویکھیا کہ دوجے پاسیوں ہنے ہنے لنگھیا
اک ٹرک فریزنگ رینزنگ توں تلھک کے جیک دے ٹرک 'چ
سدھا جا وجا سی... بڑی ہی احتیاط نال اپنا ٹرک روک کے
تلھکدا سنبھلدا کرن جدوں سین تے پہنچا تاں ویکھیا کہ انجن
دے وچ نوں دھس جان کارن جیک تے اسدا ڈرائیور گیری
سیٹاں وچ بری طرحاں پھسے ہوئے سن۔ دوناں ٹرکاں نوں اگ
پے چکی سی۔
اودھر سبھ توں پچھے آ رہے اجیت سنگھ تے بِندر اپنا
ٹرک روک ہی رہے سن کہ اوہناں دے پچھے آ رہی اک کار
رکدی رکدی اوہناں دی ٹریلر 'چ وجی تے اس توں پچھے آ
رہیاں تن کاراں بے قابو ہو کے آپس 'چ بھڑ گئیاں۔ ڈرائیو کر
رہے بِندر نے ٹرک نوں مساں ہی سانبھیا۔ تھلے اتر کے اوس
دے کالھے قدم پچھانہ کاراں ول نوں اٹھ گئے تے اجیت سنگھ
سیل فونل تے ایمرجنسی نوں کال کرن لگ پیا۔
کرن نے اپنیاں مضبوط باہاں دے بل، کروئبار نال پہلاں
ٹرک دا دروازہ توڑیا، پھیر اندر پہنچ کے سیٹاں دی دھوہ دھک
کیتی اتے جیک تے گیری نوں باہر کڈھ لیا۔ ونڈشیلڈ دے شیشے
وجن نال جیک تے گیری دے چہرے لہو لہان ہو چکے سن۔
اوہناں نوں نظراں راہیں حوصلہ جیہا دیندا کرن پھرتی نال اس
ٹرک تے جا چڑھیا، جیہڑا جیک ہراں دے ٹرک 'چ وجا سی۔
اندر وڑ کے اس نے ویکھیا کہ اگ دیاں لپٹاں توں بے خوف
ڈرائیور باہر نکلن لئی ترلے مار رہیا سی پر پیر بریک پیڈل 'چ
پھسیا ہون کارن...
پل پل ودھدی جا رہی اگ ول دیکھدیاں چنتت ہوئے اجیت
سنگھ دے اُچی اُچی کہے ایہہ شبد، ''کرن! توں رہن دے... رہن
دے، چھیتی نال باہر آ جا''، کرن نے جیویں اَن سُنے کر دتے
ہون۔ اوہ اس ڈرائیور دا پیر پھری کرن چ کامیاب ہو گیا۔ ادوں
تک اگ چارے پاسے پھیل چکی سی... ڈرائیور تاں لپٹاں دی
تھوڑی کو مار کھا کے باہر نکل آیا پر کرن دا، ٹٹ مچ چکے
دروازے وچوں پیر اکھڑ گیا تے اوہ اگ دیاں لپٹاں دے وچکار
ڈگ پیا۔
منٹاں 'چ ہی آ پہنچیاں اگ بجھاؤن والیاں گڈیاں تے
ایمبولینساں دے کامیاں نے کرن نوں اگ دیاں لپٹاں چوں کڈھیا
تے اس دی گمبھیر حالت نوں ویکھدیاں ہیلی کاپٹر راہیں ہسپتال
'چ جا پہنچایا۔ باقی دے زخمی بندیاں نوں ایمبولینساں لے تریاں۔
کرن نوں بچاؤن لئی ڈاکٹراں نے پوری واہ لائی پر...۔
اجیت سنگھ دے گھر ہاہاکار مچی ہوئی سی۔ ''او ربا! ایہہ
توں کیہ کیتائے... '' ورگے شبداں نال، آہاں بھردے لوک
دوڑے چلے آ رہے سن۔
ہنیرے تے ہنجوآں نال بھریاں اکھاں نوں کھلاء 'چ ٹکائی
سریندر کور پت نوں آوازاں مار رہی سی، ''کرن، میرے لال!
کدھر چلا گئیں توں... دیکھ میں دراں 'چ کھڑی آں... تیرے سر
توں پانی وارنے... ''
اجیت سنگھ دیاں ڈبڈباؤندیاں اکھاں اگے ہنیرا ہی ہنیرا سی۔
دکھ 'چ تڑپدا کلپدا اوہ کدی گم سم ہو جاندا تے کدی بے سرتی
جیہی 'چ بڑبڑاؤن لگ پیندا، ''میرے دیکھدیاں دیکھدیاں ہی سبھ
کجھ واپر گیائے... پترا! تیری ممی مینوں مڑ مڑ پچھ رہی
اے... میرے کرن نوں کتھے چھڈ آیائیں؟ ... دس میں کیہ
جواب دیاں... کوئی بھلا اینی چھیتی وی جاندا ہوندے... ''
لکھی تے مینوں نوں جیویں سماں نہیں سی ہتھ آ رہیا۔
ہنجوآں ہؤکیاں 'چ ڈبے اوہ ممی ڈیڈی نوں حوصلہ دین دی
کوشش کر رہے سن۔
فون تے رتن سنگھ دے افسوس 'چ کہے شبد سندیاں اجیت
سنگھ دے دل دی ہیجلی تہہ نہیں سی کُھلی پر ماں پیو دے
کمبدے بول تے سسکیاں سن کے اسدا دل کرلا اٹھیا سی۔
دور نیڑے دے رشتے دار، دوست متر، ٹرکرز تے ہور
انیکاں لوک افسوس کرن آئے سن۔
اجیت سنگھ، سریندر کور، لکھی، مینوں، جیک تے کیتھی
جدوں گھٹنا ستھل تے پھل رکھن گئے تاں دل ٹمبویں درش نوں
ویکھ کے اوہناں دے ہردیاں 'چ اچھلیا مان اکھاں راہیں وہ تریا
ہائی وے دے نال نال، دور تک، انیکاں لوکاں ولوں سجائے
ڈھیر سارے پھل اتے پھلاں نال ٹنگے ہوئے موہ بھرے شبد،
جتھے کرن دے بھر جوانی 'چ ٹر جان دا سوگ منا رہے سن،
اتھے تن جاناں بچاؤن لئی اوس دے گورومئی کرتو نوں سجدے
وی کر رہے سن۔
فیونرل توں کجھ ہفتے بعد، اک دن ٹرک یارڈ 'چ کھلوتیاں
جیک نے اجیت نال گل چھیڑی سی، ''ایجیت! لیکھی تے مینوں
تہاڈے وچ پرتنا چاہندے نے۔''
اجیت سنگھ اندر اکدم ہی ابال اٹھیا سی... اکو سمیں کئی
طرحاں دیاں بھاوناواں دا ابال، اوس نوں سہلاؤندا وی تے
ساڑدا وی... لکھی دا کوئی مہاندرا اوس دے کول آ کھلوندا تے
کوئی پرھاں چلے جاندا... لکھی دا بچپن، اوس دی جوانی، اسدا
کم 'چ جٹنا، اس ولوں اجیت سنگھ دے، سپنیاں ول ودھدے،
قدماں نوں مضبوط کرنا... تے پھیر ویاہ توں بعد اسدا رنگ
ڈھنگ ہی بدل جانا... اجیت سنگھ نوں انج لگا جیویں اس تے
گڈیاں جیک دیاں اکھاں کہہ رہیاں ہون، 'ہیء مین! کجھ بولیں گا
وی جاں سوچی ہی جائیں گا؟'... تے اندرلی اتھل پتھل وچوں
اپنی ہوند تے سمرتھا ٹوہندا اجیت سنگھ بولیا سی، ''جیک! توں
جاندا ہی ایں، ساڈے تے اوہناں دے لائف سٹائیل 'چ کنا فرق
اے... چلو اوہ اپنی تھاں خوش رہن تے اسیں اپنی تھاں جیویں
وی ہاں... ٹھیک ہاں۔''
''آل رائٹ ایجیت! پر توں اپنے آپ نوں 'کلا نہ محسوس
کریں۔'' اگلے پل جیک دے ہتھ اگانہہ ودھے، ''میرے ایہناں
ہتھاں نوں توں کرن دے ہتھ سمجھیں... آپاں کمپنی چلدی رکھاں
گے۔'' جیک دے چہرے تے جھلکدے موہ بھرے ہاو بھاو اتے
اکھاں وچ چھلکدے اتھرو ویکھدیاں اجیت دے نینیں وی نیر بھر
آیا۔ اوس نے جیک دے ہتھ، اپنے ہتھاں 'چ لے کے چھاتی نال
گھٹ لئے... ہردے اندر ٹھنڈ جیہی محسوس کردیاں اوس دی
نگاہ یارڈ 'چ گھم گئی... اوس نوں انج لگا جیویں یارڈ دی
سنگھنی چپ 'چ کھلوتے ٹرک سڑکاں ول نوں تانگھ رہے ہون۔
سڑکاں نال گفتگو کردا، کلیولینڈ توں چلیا ٹرک 'ہندل اینڈ
ہیریسن کمپنی' دے ٹرک یارڈ 'چ پہنچ چکا سی۔ اجیت سنگھ نے
تھلے اتر کے بِندر نوں لوڈ لاہن تور دتا تے آپ نال لگدے دفتر
ول نوں ہو گیا۔ جیک تیار بیٹھا سی۔ اوہ گھر نوں چل پئے۔
لونگ رومگ 'چ بہندیاں اجیت سنگھ نے سریندر کور نوں
چاہ بناؤن لئی کیہا تے آپ کوفی ٹیبل تے پئی میل دیکھن لگ
پیا۔ سبھ توں اپر، لفافے 'چوں کڈھی سرکاری چٹھی پئی سی۔
پڑھدیاں سار ہی اجیت سنگھ دا چہرہ لشک پیا... دل اندر مان
دیاں چھلاں اٹھ پئیاں... بے مہارے ویگ وچ اوس دے مونہوں،
''واہ اوئے پترا! واہ اوئے پترا... '' نکل گیا۔
ساہمنے بیٹھا، اجیت نوں تک رہا، جیک ڈاڈھا ہی اتسک ہو
رہیا سی۔ مسکراہٹ کیردے اجیت نے چٹھی اس ول ودھا دتی۔
چٹھی دے اکھراں نے جیک نوں اماہ نال بھر دتا... اتھاہ
جوش وچ باہاں الاردا اوہ سوفے توں اٹھ کھلویا تے بولیا،
''اٹ'س گریٹ... اپنے کرن نوں کنیڈا سرکار نے سولین
سائٹیشن ایوارڈ نال سنمانیاں اے۔'' اوس دے ہتھ کونے 'چ پئے
فون ول ودھے۔ پہلاں لکھی تے پھیر کیتھی نوں دسن مگروں
اوس نے خاص خاص ٹرکر دوستاں دے نمبر ملاؤنے شروع
کر دتے۔
اجیت سنگھ دے چہرے تے وی جوش ٹھاٹھاں مارن لگا۔
اینے نوں سریندر کور نے چاہ والی ٹریء ٹیبل تے لیا دھری۔
پتنی ول مان نال تکدیاں اوہ بولیا، ''سریندر! دیکھ لے... کرن
ساڈا ہی نہیں، ساری انڈو کینیڈین کمیونٹی دا سر اچا کر
گیائے... میڈیئے 'چ خبر آؤن دی دیر اے، ساڈا شیر پُتر ہر
کینیڈین دے من تے چھا جائے گا،'' اجیت سنگھ نوں سریندر
کور دا بجھیا بجھیا چہرہ ہور ہی طرحاں دا لگا۔ گلے دے رؤں
'چ اوہ بولیا، ''ایڈی شاندار خبر اے تے توں... تینوں تاں چاہیدا
سی کہ چٹھی پڑھ کے اسے ویلے مینوں فون کردی... ''
''دل 'چ تاں آئی سی کہ تہانوں فون کراں، جیک اتے
ہورناں نوں وی دساں... پر پھیر سوچیا، جد ساڈا سرو ورگا
جوان پت ہی نہیں رہیا تاں کیہ کرنا ایس ایوارڈ نوں۔ جے اج
کرن جیوندا ہندا... اپنے ہتھیں انعام لیندا... رج رج خوشیاں
ماندا... اسیں وی اس نال اڈے پھردے... '' سریندر کور دا گلا
بھر آیا۔
اجیت سنگھ دا جوش وی دھوئیں جہے چ بدل گیا... سوفے
توں اٹھ کے اوہ دیوار تے لگی تصویر موہرے جا کھلویا۔ اوس
دے دوویں ہتھ انج ودھے جیویں اوہ تصویر 'چ مسکرا رہے
کرن نوں باہاں 'چ لے کے اسدا متھا چمن جا رہیا ہووے... اوس
نوں پتہ ہی نہ لگا کہ کدوں اوس دیاں اکھاں چھلک پئیاں۔ اس
ول ویکھدیاں سریندر کور دا وی رون نکل گیا...
جیک نے فون بند کر دتا۔ اپنے ہتھ اجیت سنگھ تے سریندر
کور دے موڈھیاں تے دھردا اوہ بولیا، ''ایجیت! سریندر! میں
تہاڈے درد نوں سمجھدا ہاں... پر آپاں نوں مان ہے کہ اپنا کرن
اج کنیڈا دے اتہاس دے سنہری پنیاں 'چ چلا گیائے۔''
''پر ساڈے اتہاس 'چ تاں ہن ہنیرا ہی ہنیرا اے۔'' سریندر
کور دی آواز درد نال بھری ہوئی سی۔
جیک دے چہرے تے گورو جھلک رہیا سی۔ اماہ بھری
آواز 'چ اوہ بولیا، ''ہنیرے وچ وی لوء ہوندی اے... تاریاں دی
لوء۔''
(اُلتھا:
ایم آصف)
